* الناس اللى هاتروح النار حدف بيسألوا: وإيه صفة «سيف الإسلام» ابن القذافى علشان يهدد الشعب الليبى بالذبح ويتهم مصر باتهامات سخيفة..؟! يا جماعة.. عيب.. مش ضناه برضه لازم يساعده.. دا الضنا غالى..! وبعدين تعالوا نتخيل لو أن القذافى ده عنده محل فرارجى.. مش واجب على ابنه سيف أنه يساعده.. يدبح له الفراخ.. وينضفها.. ويقطعها ويحطها فى أكياس.. ويقف فى المحل مكان أبوه، لو الوالد حَب ياخد له «تعسيلة» ساعة العصارى..؟! وطبعاً حد غلباوى هايقول لى: القياس غلط يا باشمهندس هناك فرق السما من العمى بين إدارة دولة وشعب وبين إدارة محل فرارجى بفراخه وبطه ووزه.. وكتاكيته..؟! أرد وأقول له: بصراحة بعدما سمعت كلام سيف.. وأبوه القذافى اللى بيهددوا فيه الشعب الليبى بالذبح.. أعتقد أن القذافى بيحكم ليبيا بنفس منطق الفرارجية.. وبتوع الفراخ..!! * روح يا شيخ مِنَّك لله؛ خربت بيتى.. سمعت كلامك واعتصمت فى أوضة الصالون ورفعت يافطة: «البيه يريد إسقاط المدام»..!! - جميل جداً.. وإيه اللى حصل بعد كده..؟! - أبداً.. رفعت لى هى يافطة بتقول: «مش هانمشى هو يمشى.. أنا مش هادلعه.. أنا رايحة أخلعه»..!! عيب قوى إن أمريكا بجلالة قدرها تقرر منح مصر 150 مليون دولاراً فقط لمساعدتها على تجاوز الظروف الاقتصادية الراهنة..!! يا جماعة عيب.. ال 150 مليون دولار دول حاجة ببلاش كده.. دا الواحد يخش بيهم السوبر ماركت ويخرج بربع جبنه اسطمبولى وتمن بسطرمة و10 بيضات! بصراحة.. بلاها معونة البيت الأبيض.. لأننا من زمان عارفين إن «البيت الأبيض عمره ماينفع فى اليوم الأسود»..!! * أنا بعد العُمر ده.. وبعد 37 سنة صحافة.. والكام ملطوش اللى باخدهم واللى مايجيبوش عيش حاف.. قررت أنى أشتغل حاجة من اتنين: لعّيب كورة.. أو رقاصة..!! ولأنى ماانفعش أشتغل رقاصة لأسباب فنية منها إنى بشنب.. فقد قررت أن أتوكل على الله وأشتغل لعّيب كورة فى منتخبنا الوطنى..!! واحد هايسألنى: طيب دا أنت مابتعرفش تجرى ولا بتعرف حاجة فى الكورة.. دا كده المنتخب هايتغلب من طوب الأرض..! ها أرد عليه وأقول له: وإيه يعنى ماهو نص لعّيبة المنتخب مابيجروش ولا بيلعبوا كورة.. وبرضه بيتغلبوا من طوب الأرض..! * كلمة ورد غطاها: * شفت البنت اللى بتاكل صابونتين على الفطار على غيار الريق كل يوم الصبح..؟! ** شفت يا سيدى ماهو دى بتاكل الصابون وبتغسل وشها.. بالجبنة..!!