لأسباب خاصة ترتبط بحب النميمة والرغبة في التعرف علي بعض الخلفية الثقافية والاجتماعية لطلاب جامعاتنا، واجهتني شهادة طالبة جامعية تنتشر وقائعها بين الآلاف في أرجاء مصر، إنها شهادة البنت نوسة. - لو سمحت يا دكتور، ممكن أتكلم مع حضرتك. - أهلا بك في مكتبي، اتفضلي اجلسي، أهلا يا بنتي. - أهلا بك يا دكتور، أنا نوسة، أنا سعيدة أني بكلم حضرتك. - أهلا بك يا نوسة، وأنا أسعد بالتعرف علي نوسة الجميلة؟ - أنا نوسة طالبة عند حضرتك، بابا أشتغل سنوات كثيرة في دول الخليج وهو لسه قاعد هناك، وماما ربة بيت قاعدة معانا هنا في مصر، أنا اتولدت هناك، وإحنا ثلاث بنات ولنا أخ واحد، حاليا إحنا ساكنين في أحسن منطقة في مدينة المنصورة، ساكنين في شقة فخمة في عمارة كبيرة تطل علي النيل. - ايه رأيك في بلاد الغربة يا نوسة. - عشنا هناك عيشة حلوة يا دكتور، الناس هناك ماشيين علي شرع ربنا. - رجعتوا من السفر إمتي يا نوسة. - الحمد لله ربنا سترها معانا، لما قربنا من شهادة الثانوية العامة، بابا رجعنا من الغربة علشان نتعلم في الجامعة في مصر، قلنا نرجع بلدنا وكفاية غربة، صحيح كثير من المصريين غلابة ومتخلفين وجعانين وعطشانين، وكثير من الشباب في مصر مش متربيين، لكن مصر بلدنا وإحنا بنحبها. - علي فكرة يا نوسة إنتي ملابسك شيك قوي، الظاهر عليك انك مخطوبة. - الحمد لله ربنا سترها معانا، أنا مخطوبة لواحد من معارف بابا، خطيبي والده بيشتغل في الإمارات، لكن أمه وأخواته البنات عايشين هنا في مصر، خطيبي سافر للسعودية وإنشاء الله أسافر معاه بعد الجواز. - يعني ممكن تسافري قبل انتهاء الدراسة من الجامعة. - الحمد لله ربنا سترها معانا، أنا رأيي انه مفيش سفر قبل البكالوريوس، علشان البكالوريوس شهادة أشتغل بها في السعودية ويكون دخلنا أحسن، وعلي كل حال أمر السفر راجع لرأي والدي ولخطيبي. - قولي لي يا نوسة، إنتي ناويه تدرسي إيه من مواد التخصص في الكلية. - الحمد لله ربنا سترها معانا، أنا ادرس أي حاجة يا دكتور، كلها دراسة محصلة بعضها، أنا عاوزة شهادة بكالوريوس من الجامعة والسلام، المهم أني لا أدرس علم التأمين. - إيه السبب يا نوسة. - يا دكتور التأمين حرام، بابا بيقول إن التامين حرام، كيف نحسب ونحصي علي الناس أرزاقهم؟، يا دكتور عمليات التأمين فيها حساب لرزق الناس. - إنتي إيه رأيك في الكلام ده؟ - الحمد لله ربنا سترها معانا، أنا موافقة علي رأي بابا أن عمليات التأمين ودراسة التأمين حرام، إحنا إزاي نحسب عمر الإنسان ونحسب له المصائب اللي بتحط عليه، دي مقادير كلها قسمة ونصيب من عند ربنا، ولا يجب أن نتدخل في قدرة ربنا. - يا بنتي التأمين علم، والعلم مطلوب علشان الناس يفهموا الدنيا. - يا دكتور، التأمين يتعارض مع الدين. - نوسة الجميلة، ممكن أقول حاجة. - اتفضل يا دكتور، أنا نفسي أسمع رأي حضرتك. - يا نوسة اعذريني، أنت لا جميلة ولا حاجة، أنت جهاز عديم الشخصية يعدونه لإنتاج أطفال متخلفين، أبوك عبد فلوس مسعور، وأمك لا تعرف معني الأسرة، وأهلك نوع من البشر يفكرون بعقول مغلقة ويعيشون مشردين من غير وطن.