يا كلمتي لفي ولفي الدنيا طولها وعرضها وفتحي عيون البشر ع اللي حصل علي أرضها..! علي ارضها حاضنة الحاجة نفيسة اختها الست ماريا في مشهد درامي يظهر للعالم تماسك الوحدة الوطنية.. وأن المصري كريم العنصرين..!! هزني المشهد المأساوي والدموع تحجرت في عيني.. ليس من مشاعرالبوس والاحضان انما جاءت من البؤس والفقر اللي ماسك في عنصري الأمة..الحاجة نفيسة والست ماريا لبسين شوية هلاهيل.. الست ماريا لبسة جاكت كان في الاصل بطانية، والحاجة نفيسة لبسة شال ينفع تشلشل به علي ميت ومش كده وبس دا كمان الجزم أجارك الله البوذ مقطوع والرطوبة وكلاها..! يعني باختصار كده الاثنين نموذج لضحايا العدوان الثلاثي اثناء التهجير ..!!يعني بنتفرج علي فيلم للمعذبين في الارض والسماء وملهوش حل !! والله العظيم أنا مكنتش عارف اضحك ولا ابكي وأنا أتابع هذا المشهد المؤثر اللي فيه الناس الغلابة وهما طالعين في التليفزيونات وعمالين يتغنوا بحكاية كريم العنصرين..!! قال ايه: مصر نسيج واحد وفيها وحدة وطنية محصلتش ؟! طيب يا عمنا ما احنا عارفين كويس أن المصريين نسيج واحد..ومافيش حاجة اسمها مسلم ولا مسيحي.. والكلام الكبير أوي اللي كل يوم إخوانا المثقفين والمفكرين والمذيعين اللي نص لبة دوشنا ومصدعين دماغنا بيه ليل ونهار..! ! ومش لقيين حاجة تانية يتكلموا فيها..!! كل ما تحدث بلوة أو مصيبة يخرج علينا شوية الشكحلية ويوجعوا نفخنا بالكلام الكبير أوي اللي انا و80 مليون مصري مش فهمينه ..!! مش كفايا علينا العذاب والضني اللي احنا فيه!! يا إخوانا حرام عليكم اللي بيحصل ده..!! الناس اليومين دول بتستطعم الفقر و بتبوس اديها وش وضهر وتحمد ربنا.. وتطلب من الله سبحانه وتعالي ان يديم عليهم هذه النعمة.!!يا عيني علي الغلابة اللي يخرجوا من نقرة ليقعوا في دحديرة..!! دول مش عارفين يهرشوا والغلب والفقر اللي وكلهم بسبب لقمة العيش..!! صحيح قليل البخت يلاقي العضم في الكرشة..!! ويجي شوية ارهابيين ملهمش لزمة من بتوع القهر الازلي والعذاب الابدي ويرتكبوا جريمة بشعة في حق ناس المصائب والكوارث اخذت منهم رءات وكسرت ظهورهم..!! يا عالم ياهو حد فيكم يفهمني ملة شويه الإرهابيين دول ايه وعايزين ايه..؟! مش معقولة يكونوا مسلمين موحدين بالله؟!يا أهل التطرف والتعصب أرحمونا يرحمكم الله..فعلتم في ابائكم وابنائكم اعمال يشيب لها الولدان..!! قلتم انكم مجاهدون.. ولكنكم كذبتم..؟! الجميع يعلم تماما انكم لستم مجاهدين وانما انتم اصحاب مخطط شرير يستهدف الابرياء والضعفاء..!! فالمجاهدون في سبيل الله لا يفجرون الاطفال ولا النساء ولا العجائز ولا يروعون الناس الآمنين في اعيادهم..!! المجاهدون الاشراف الابرار..يجاهدون في سبيل الله ضد قوي الظلم والطغيان..!! يا من تقولون عن انفسكم مجاهدين.. ألم تشاهدوا الفضائيات وهي تبث للعالم أعمال القتل والارهاب الصهيوني في أطفال ونساء المسلمين داخل فلسطينالمحتلة..!! ألم يحرك مشاعركم قوي الطغيان العالمية وهي تقف بالمرصاد لأي قرار يخص الامة الاسلامية.. !! انتم وحدكم ايها الغافلون التائهون دون خلق الله تتصورون انكم يد الله العليا في الارض.. تنفذون ما تهوي به انفسكم وتنسبون اعمالكم القذرة لله سبحانه وتعالي و الله بري منكم ومن أفعالكم..!! وسيكون رسول الله خصيمكم.. يوم القيامة..!! أتفووو علي دا زمن..!! يقتل فيه الغلابة والمساكين بأشد انواع المتفجرات في الوقت الذي يمرح فيه الظالمون المعربدون القتلة داخل أرضنا في فلسطين..!! ياله من شعور بالاحباط واليأس عندما تدرك انك مجرد نملة علي الطريق لاحول ولا قوة لها.. تدهس لمجرد انك تبحث عن لقمة العيش..!! ولكن لأن كل شيء مكتوب ولازم تشوفه العين فكان لابد ان نلملم جراحنا وندفن شهداءنا ونقسم بالله العظيم أن نأخذ ثأرنا مهما طالت الايام ومهما كانت التضحيات..!! فدم شهدائنا لن يضيع هدرا..!! يا ناس ياللي ما عندكمش دم.. دول ناس تفجروهم.. مش كفاية الغلب والفقر والعذاب والذل اللي هما فيه..!! ارهابيين ما عندهمش دم بصحيح..!!