يراجع الشاعر جمال بخيت ديوانه "دين أبوهم" المنتظر صدوره خلال النصف الثاني من شهر سبتمبر القادم عن دار "جزيرة الورد". وعن الديوان يقول بخيت ل"محيط": قصائد الديوان ترصد حالة مصر السياسية ما قبل قيام الثورة، يضم الديوان حوالي عشر قصائد، إضافة إلى نصوص غنائية لمسلسلي "سنوات الحب والملح"، و"السائرون نيامًا"، كلها قصائد نشرت من قبل، أو قيلت عبر الإعلام، عدا قصيدة أو اثنين جديدة على حد قول الشاعر. يواصل: الديوان لا يحتاج مني إلى تفرغ، لذلك وأنا أراجعه أكتب غيره، لأن الشعر مشروع مستمر ودائم. جمال بخيت أحد أبرز الشعراء المعاصرين، اشتهر باسم مسحراتي العرب، لمناصرته في كثير من قصائده القضية الفلسطينية، واشتهر كذلك بشعره الغنائي وقد كتب العديد من تترات المسلسلات والأفلام، وغنى له كبار المطربين مثل محمد منير وعلي الحجار، وله عدة دواوين، وسبق وأن حصل على المركز الثالث في مسابقة "أمير الشعراء" عام 2008. ويوجه بخيت في قصيدة "دين أبوهم" التي يحمل الديوان اسمها انتقادات لاذعة للحكام العرب، فيقول في قصيدته: دين أبوهم اسمه إيه ؟ اللي باعوا وطن بحاله خُضرته .. وصُفرة رماله نسوته .. وشهوة رجاله بهجته .. ودمه .. وعياله خطوته وسنين نضاله ثورته .. ضد احتلاله دين أبوهم اسمه إيه؟! اللي فتحوا القلب لخيول العدو اللي حبسوا العقل في زنازين جنون اللي حاصروا الكرم والتين والزيتون دين أبوهم اسمه إيه ؟! مين إلهه ؟! مين رسوله ؟! فين كتابه ؟! فيه ملايكة ؟! ولاّ غابوا فيه شياطين ؟! ولا تابوا لما شافوا التابعين شرهم زاد عن جهنم شر .. لا يمكن حسابه دين أبوهم اسمه إيه ؟! حتي فرعون اللي صدق إنه من نسل الإله واللي قال إنه الإله كان بيبني الأهرامات للممات قبل الحياة كان له بعث ويوم حساب كان له دولة .. حضور .. إدارة .. كان منارة ترشد الكون للحضارة .. كان له جيش فارض وجوده كان محارب بين جنوده واما يتجاوز حدوده كان له رب يغرقه وينقذ يهوده حتي فرعون اللي صدق إنه من نسل الإله واللي قال انه الإله .. كان له كهنة ف العلوم يقروا ف كتاب الكواكب يرصدوا سير النجوم يفتحوله سكك .. بيبان في سراديب الزمان ويقولوله إزاي يدوم حنطوه .. خلدوه بالمعاني والمباني الرسوم كانوا كهنة مؤمنين خلوا كلمة مصر .. دين حاضرة ف العهد القديم حاضرة ف العهد الجديد حاضرة ف القرآن حضور الآيات فيها تدور مُفردة عز وجلال مُعلنة .. وبين السطور تخترع ثانية وشهور تخترع شعر وبحور حتي فلاحها الفصيح شكوته بتشع نور إيه يامصر ؟! إيه يا أرض الطيبين اللي حكموا ف الزمان دا يبقوا مين ؟! دين ابوهم اسمه إيه ؟! حد يعرف فيكو دين كل اتباعه لصوص أو قوادين ف المعاصي مولودين ف الكراسي مأبدين ف التفاهة .. معدودين ف السفاهة .. مفرودين ع البلاهة .. مسنودين للشراهة .. مُجندين ع القرف .. متعودين ع الشرف .. متمردين ع الوطن .. متنمردين بالخيانة .. موحدين اللي يعرف دين كده يقوللي عليه .. دين أبوهم اسمه إيه ؟!؟
