قدّم الفنان المصري أحمد مالك اعتذاره على خلفية نشره فيديو مُسئ للشرطة قام به هو ومراسل تليفزيوني، وأكد بأن ما فعله هو فكره متهورة جاءت في لحظة إحباط. وقال مالك في تدوينه عبر صفحته بموقع التواصل الاجتماعي «فيس بوك»، اليوم الثلاثاء: «بعتذر بشده لكل شخص أساءه الفيديو وخاصه الشرطه.. الفيديو فعلاً فيه تجاوزات لم أتوقع أنها تخرج بره دائره الأصدقاء وده مش مبرر على الخطأ». وأضاف الفنان المصري: «أنا عمري عشرين سنه وساعات في السن ده الأفكار المتهوره بتسبق التفكير العقلاني وللأسف الغلطات دلوقتي بقت مسجله ومصوره وده بيديها عمر وحجم أكبر من حجمها الحقيقي، دي لحظه تهور ولحظه مش محسوبه وفعلاً ندمان عليها وحاولت مسحها ولكن كنت فوجأت أنها انتشرت قبل ما اقدر انقذ الموقف». وتابع: «يمكن الموقف ده كله نابع من إحباط عدم القدره على التعبير عن الرأي اللي جيلي حاسه الأيام دي بس برضو ده ميدينيش الحق اني اتجاوز أو أعبر عن رأيي بطريقه متجاوزه في حق الآخرينن اكتر حاجه مضايقاني انه هيتم استخدام اللحظه دي لتشويه الثوار والثوره ومقدرش الوم حد في النقطه دي إلا نفسي اللي الاحباط عماها». واختتم مالك: «اتمنى من الجميع انهم ميتعاملوش مع اللحظه دي على انها بتلخصني ويتعاملوا معاها انها لحظه عابره لن تتكرر، مره آخري بعتذر».