«على باب السما " ديوان شعر جديد للشاعر منصور رجب ، وهو الديوان الفائز بالمركز الأول فى مجال شعر العامية المصرية ، فى المسابقة الأدبية المركزية التى اقامتها مؤخرا الهيئة العامة لقصور الثقافة ومن اجوائه نقرأ :
«يا بختها الكراريس» واسعة خطاوى البرق ع السكه والسكه ضى مشدودة عينى لخطوتك والخطوه مى نزفت عيونى كام سما مشويه شى لما فاتتنى مغّربه ومسكت سلك الكهربا ودخلت تلك التجربه أصبحت حى عسليه عين البنت والدم ..مش ميه الدم دم والضمه مش تأثير تعب الضمه ضم والضمه مش تقليد ومش ضمه وخلاص الضمه م الإحساس والضحكه مش لون الدهب الضحكه ماس نِزلت إِيدين البنت من فوق صدرها يا بختها الكراس كان نفسى اكون زيها لكنها باصه بعينيها الناس مخنوقة عينى بدبلتك فقطعت صابعى الخنصر البنصر كفى اليمين طبطب على ضهر الشمال يواسيه فغار من الأيسر مسروقه روحى لدنيتك وانا اللى شيخ.. منصر لما فاتتنى خطوتك كالبرق ع السكه عينى بقت فناجين بتدلدق الدهشه . «المصطبة» المصطبة هي اللى شاهده على انفلات الليل وإنسلاخ النهار هىّ المُشاركه ف انكسار الليل وإنتصار النهار هىّ المحافظة على انكتام السر مع إنها بتذيعه بره الدار المصطبة تطلع من المدخل وتقعد تحت ضل البيت تطلع تكح وتسند ضهرها للحيط تسترجع المشهد كان النهار عيل واقف فى باب الحاره مستنى حد يشد له الترباس كانت تقوم م الندى وتكّمل الحواديت اللى انتهت ناقصه وتساعد الكناس كانت تبعتر فى المدى كبت المشاعر.. اللى متحاصر ه جوا البيوت والناس كانت تغنى تزقزق العصافير فى صوتها وتهدل اليمامات كانت بتمنح للولاد فرصة لقا والبص فى عيون البنات كانت تشارك فرحُهُم تستقبل المعازيم وتقدم الشربات وف حزنهم بتودع الراحلين وتصّبر اللى عاد فلا كل من كان حاضر وسطهم عايش ولا كل من غاب م الحياه يبقى بروحه مات المصطبة فيس بوك حارتنا العتيقه قبل اهتداء المخترع وتويتر الشارع على حجرها كتبوا حكايات ألف ليله بسحرها البارع واتقابل الملك السعيد مع شهرزاد على حجرها أتعّرف الواد ع البُنيه وحُبها الفارع قول يا فتى :- (زوجتُك) واتلم شمل المُشرّع بحكمة الشارع . «على باب السما» ( مدخل ) مربوط ما بين قطرين بيجروا عكس بعض فلا روحي طايره في السما ولا رجلى لامسه الأرض مصلوب يا نني ع البيبان يمكن ..تبان الوقت مغرب والملايكه مروحين سايبينى وحدي ع الرصيف مركون قلبي ..رغيف معجون مرمى ..على جمر الحنين والانتظار والعتمة من غير ضى نور والليل نهار وخيالي بيشد الرحال ورا بنت ما اعرفهاش ورا بنت حضنها عجر لسه ما استواش هربانه منى في السما قافلة البيبان وأنا المُريد اللى سما بروحه وما بعنيه ما شاف والشوف بيان مصلوب يا نني ع البيبان يمكن تبان . «تحدي» إرفع إيديك للسما إرفع لفوق راسك إصرخ وثور ع العما حيخافوا حراسك