بما ان الطيب فى الزمان دة بيقولوا علية عبيط يبقى اللى يضيع موهبتة او موهبة اى شخص اخر انسان عبيط . كلنا عارفين ان الموهبة يهبها الخالق لعبادة يرزق بها من يشاء احيانآ يكون الشخص موهوب بالفطرة ربنا خلقة طلع موهوب فى مجال معين واحيانآ اخرى بيكتسب الشخص الموهبة بالتعليم والتدريب يبقى موهبة بالفطرة وموهبة بالآكتساب والاثنين رزق من ربنا طيب ازاى نعرف العيل لما يتولد ممكن مثلآ يكون موهوب وطلع اديب كبير ولا كل معرفتة عن الورق اننا بنلف بية السندوتشات .
المجتمعات الاوربية تعرف ازاى تكشف دة فى الاطفال وهمة خبراء فى اكساب الموهبة للاطفال ولو وقع فى ايديهم طفل موهوب بالفطرة تأكد تمامآ انهم هيعملوا منة عبقرى او فلتة وكل دة بيكون عن طريق العلم والدراسة بيشوفوا دماغ العيل اية اللى فيها ويشجعوة بيدرسوا ميولة افكارة هواياتة ويغرسوا فى العيل الثقة بالنفس يعنى اللى جوة دماغ العيل هوة اللى بيحدد ممكن ينجح ويجيد فى اية .
مثال بسيط كلنا شفنا ازاى بيعلموا الاطفال السباحة بيرموهم فى حمام السباحة وهمة عمرهم لا يتعدى بضعة اشهر علشان كدة بيطلع منهم السباح اللى ممكن ياخد سبع ميدليات دهب فى دورة اولمبية . تيجى تبص على عيلنا لو ركبين عربية ومعديين فوق كوبرى على النيل بيرفعوا رجليهم من خوفهم من المية وعلشان كده بيغرقوا فى الاسكندرية وفى مرسى مطروح .
يعنى مش لازم نخوف ولادنا على الفاضية والمليانة نخوفهم من القطة ومن الكلب ومن البحر ومن الضلمة لاحسن ابو رجل مسلوخة ياكلك نخوفة من العسكرى لحد مايطلع حرامى اغرس فى ابنك الثقة بالنفس نمى ذكائة متخفش علية من اى حاجة ومن كل حاجة علشلن متزرعش فية الخوف خاف وحرص علية بس مطلعوش خواف . اول حد ممكن يلاحظ الموهبة فى الطفل الاب والام ودورهم التشجيع وتنمية الموهبة دى .
بعد كدة المدرسة والمصيبة السودة المدرسة مش هتكلم عن المناهج اللى ممكن تخلى واحد فى موهبة الدكتور طة حسين الادبية مقرىء فى ترب الغفير . محتاجين ناس تخطط صح نبص حولينا نشوف الشعوب المتقدمة بتعمل اية ناخد منهم نعمل زيهم بما لا يتعارض مع اخلاقنا ودينا .
- طيب طبعآ عارفين اينشتاين اللى ميعرفهوش البرت اينشتاين دة عالم شهير فى الفزياء حاصل على جائزة نوبل فى الفزياء سنة 1921 وصاحب نظرية النسبية وهو صغير كان يعانى من صعوبة فى الاستيعاب وكان تلميذ فاشل رسب فى مادة الرياضيات ولولا تبنى اثنين من اعمامة رعايتة واكتشاف وتنمية موهبتة لما وصل الى النجاح.
- احنا والحمد للة عيالنا كلهم مواهب اذا مكنش عندهم مواهب علمية او رياضية او ادبية او فنية فعندهم مواهب فى العفرتة وحرق دم ابوهم وامهم بس المواهب دى بتضيع لعدم اهتمام الاب او الام او عدم اكتشافهم لهذة الموهبة او اهمال المدرس او جهل المعلم .
- مثلآ عيل يقوم يناقش المدرس فى موضوع تلاقى المدرس يبص للواد بأرف ويقولة اقعد ياد انت هتتفلسف الواد يقعد ويحرم انة يفكر او يشغل دماغة تانى يعنى بالعربى احنا اساتذة فى وأد المواهب خد عندك مثلآ انا . وانا صغير كنت لعيب كورة ربنا ما يوريكم باك يمين ولا عصام الحضرى فى زمانة بس ملقتش حد يشجعنى ولا فى البيت ولا فى المدرسة وكان اللى بيلعب كورة يقولوا علية فاشل ياواد ملكش دعوة بالواد المنيل دة دا مقضيها كورة ليل ونهار مفيش غير وانا فى الكلية اتعرفت موهبتى جانى واحد من الزملاء قالى عصام انا عرفت انك حريف كورة رديت علية بعنطزة ياعنى قالى طيب ممكن تيجى تحكم لنا الماتش بتاعنا هية دى المرة الوحيدة اللى الناس قدرت موهبتى .
- كتير مننا شاف لعيبة فى كتير من اللعبات وقال يانهار ابيض دا انا العب اللعبة دى احسن منة دا انا لو خدت الانفراد دة كنت جبتها جول او تسمع مطرب بيغنى تقول دا انا صوتى وانا فى الحمام بغنى وانا باخد دش احلى منة مش لازم تحقد عليهم بالعكس دى ناس جديرة بالاحترام لانهم من ربع ونص موهبة قدروا يوصلوا للى كانوا بيحلموا بية وتحاول تظهر موهبتك وتقاتل من اجل ذلك متيأسش لو فشلت مرة جرب مرة ومرة ومرة اخرى ومتسمحش لحد يدمر موهبتك او موهبة عيل من عيالك فلا حياة مع اليأس ولا يأس مع الحياة.
