ولاء حمودة البلد داخله علي أنتخابات الرئاسه والعبده لله متعرفش ازاى تختار رئيس للجمهورية حالي كحال السواد الاعظم من الناس,ورغم انى عندى قدر من الثقافه العامه الا اني بردوا معرفش؟ ازاى ادى صوتي لمن يستحق....ازاى اختاره؟ ايه هيا مواصفاته؟ وازاى ائتمن المرشح علي مستقبل بلدي؟ كل الاسئله ديه بذهني... فيكف حال اللى معندوش قدرا من الثقافه؟مش بقول انى عبقريه ولكن الحمدلله بفهم شويه.... لحد دلوقتى مش لاقيه برنامج انتخابي واحد سوي شعارات و رؤي, وانا عايزه شخص يفهمني حيعمل ايه بره وجوه مصر. شكل مصر حيبقي ازاي معاه.... انا هقول رايى .. ورزقي علي الله بلاش دولة العواجيز ديه ارحمونا بقى دى الرحمه حلوه هوا ليه الناس فى بلدنا تفضل تشتغل لحد ما تتكل أو تتخلع .فى اى بلد تانيه الواحد مش عيب لما يستجم ويستمتع بوقته بعد الخمسين . بلاش نموت على الدنيا اوى كده ده غير ان البنى ادم بعد 55 يفقد الكثير من لياقته النفسية وكفاءته العصبية والواحد شاف مرشحين فوق 70 سنه ربنا يديهم الصحه . ميبقاش عنيد ودكتاتور ولا يستعمل سياسة المركزيه الفاشله عيب ديه مش بلد أبوه ديه بلد أبهاتنا كلنا. لازم يعمل اجتماع كل شهر مع الشباب من كل التيارات السياسيه و الحزبيه احنا عندنا الاف الشباب من الكفاءات فى كل المجالات. يقدم إقرار ذمته المالية سليم ومش مضروب وأنه ميكونش رجل أعمال أو عسكري وأنه يمنع أساليب القمع والعنف اللى بتستخدمها الداخلية لحماية الرئيس والنظام وأن يكون له نائب منذ أول يوم فى سلطة الرئاسة. يكون خبرة في العمل العام والسياسي مثقف وعلي دراية تامة بمشاكل البلد ويكون عنده فكر اقتصادي منفتح مش الآخوه اللى عايزين يعملوا دعايه ليهم على قفا الديمقراطيه هى مصر ديه كعكه وبنقسمها ؟؟ يعنى ايه لاعب كوره او فنانه ترشح نفسها متخليكوا فى اللى انتوا فيه احسن واضح انكوا فاهمين الديمقراطيه غلط . يصلح أجور الموظفين وبحارب الغلاء وجشع التجار وميسبش رجال الأعمال يبرطعوا باراحتهم بمصالح وثروات البلد ويهتم بالتعليم والصحة ومشاكل إسكان الشباب وإنهاء طوابير العاطلين من أصحاب المؤهلات اللى على القهاوى مع الاهتمام بالزراعة وأحوال الفلاح. يلغى قانون الحصانة ويكون أى مسئول خاضع للرقابة والمحاسبة وان كان رئيس الدولة أو عضو البرلمان أو وزير أو رئيس مؤسسة أو غيره , و يطبق عليهم زى غيرهم قانون : من أين لك هذا ؟ وتكون كل المناصب فى الدولة بالانتخاب الحر المباشر ، ويلغى مبدأ التعيين فى المجالس النيابية والتشريعية والتنفيذية العليا , بما فى ذلك منصب شيخ الأزهر وأساتذة الجامعات وعمدائها ورؤساء المجالس القومية فى جميع المجالات بما فيها المجلس القومى لحقوق الانسان والمجلس القومى للمرأة . الولاياتالمتحده العربيه ايوا هوا الاتحاد الآوربى احسن مننا فى ايه؟ ده احنا 22 دوله عربيه يعنى قوه عطمى لازم نتحرر يعنى يحارب العولمة الاستغلالية والسيطرة الاستعمارية الأمريكية الأوروبية الاسرائيلية. وقبل ما انسى فى حاجات مهمه تانيه -ميكونش من المنوفية او يعرف اى حد من المنوفية -يبقى بيغير على مراته جدا وميوريناش وشها السمح -عنده حساسية من ميدان مصطفى محمود -مايروحشي شرم الشيخ -لو عبارة غرقت يقلع وينط يجيب الناس م الميه -يكون متعلم في مدارس حكومية عشان يعرف اد ايه الشعب أصيب بالغباء -بيشرب شاي العروسة -بيتعالج في التأمين الصحي وبيقف في الطابور كمان -نمضيه على كمبيالات ونخليها معانا لحد ما يسيب الحكم
