هاجمت الفنانة شيماء سيف ما وصفته بالعري بالمصايف، وذلك من خلال إعادة نشر منشور عبر صفحاتها على مواقع التواصل الاجتماعي. وأشارت شيماء إلى أن المنشور منقول لكنها توافق على ما جاء فيه، وهو: "خلاص الصيف بيخلص لكن آثاره مكملة، طول عمرنا بنطلع على البحر ونشوف أشكال وألوان مايوهات.. لكن السنة دي العري فاق الوصف، المايوه بقى يتلبس في كل مكان مش على البحر بس.. توب المايوه (اللي في نظري جزء من الملابس الداخلية وده أكثر وصف مؤدب أقدر أقوله) بقى اللبس الرسمي للبنات وفوقه كاش مايوه بيبين أكثر ما بيستر". وأضافت: "هي البنات دي مالهاش أب أو زوج أو أخ قلبهم ياكلهم عليهم والدم يجري في عروقهم؟، فين نخوة الرجالة؟.. فين حياء البنات؟.. والمصيبة إن كل الأعمار وكل الأحجام مش بتفرق، الموضوع زاد قوى تحت مظلة إنه بلاش body shaming وكلام فاضي". واستكملت: "فين الحياء؟، الجسم ده المفروض نحافظ عليه مش نمتع غيرنا بيه، الغلط غلط ولو كل الناس عملوه، الغلط غلط ولو أصبح عادة الكل، هفضل أقول ده غلط حتى لو كنت لوحدي اللي بقوله، العري مظهر من مظاهر التخلف الفكري واللي فاكر إنه تحضر ماشي وراء القطيع بدون وعي". وأردفت: "فين الحياء والعفة والخجل والخصوصية؟.. بالنسبة للي عنده أولاد صغيرين وبيسألوا هي ليه البنت دي لابسة كده يا ماما؟، كل شيء بقى مباح كدة للناس كلها؟". واختتمت المنشور قائلة: "ربنا يستر علينا جميعاً ويهدي البنات والأولاد ويشوفوا الغلط غلط مهما كتر.. ربنا أرنا الحق حق وارزقنا أتباعه وأرنا الباطل باطل وجنبنا أتباعه"، وأضافت شيماء في نهاية المنشور جملة "منقول بس قال اللي جوايا.. "منقول من صاحبتي ملك صالح بس قالت اللي جوايا بالحرف". وأثارت شيماء جدلا واسعا، وجاءت تعليقات الجمهور بين متفق معها، وآخر رأى الأمر حرية شخصية، وعلق أحد المتابعين على المنشور عبر صفحتها بموقع "انستجرام"، وكتب: "أتفق معاكي نوعا ما، بس نشوف إذا نحفتي بتسوين أكثر منهم وتذكري كلامك"، وردت عليه شيماء، قائلة: "وأنا هخس عشانك مخصوص وعشان أعرفك إن كلامك غلط". وكتب آخرون: "دي حرية شخصية اللي مش عاجبه ميعملش زيهم، مش اللي بيلبسوا بوركيني حرين واللي بيلبسوا بكيني كمان حرين"، "كلام في الصميم"، "مش يمکن انتي لو ماکنتي وزنک زايد کنتي لبستي مايوه"، "كلامك صح 100%". وعُرض مؤخرا للفنانة شيماء سيف، بدور العرض السينمائي فيلم "مطرح مطروح"، وهو بطولة محمود حميدة، كريم عفيفي، ليلى أحمد زاهر، ونخبة من النجوم، ومن تأليف محمد عز وإخراج وائل إحسان.
