دخلت الفنانة روجينا، في حالة من البكاء، عند سؤالها عن فترة مرض زوجها الفنان أشرف زكي، قائلة: "دي كانت فترة صعبة أوي في حياتي أنا وأشرف وبناتي، كنت بلبس فيها قناع الراجل المتحمل المسؤولية، لأني فجأة تلاقي الراجل اللي عايشه معاه سندك في مشكلة كبيرة". وقالت "روجينا" في حوارها لبرنامج "أنا والقناع" والذي تقدمه الإعلامية منى عبدالوهاب، على فضائية "الحياة" اليوم الثلاثاء: "لقيت نفسي في دقائق لازم نخش نعمل عملية، ولازم أكون الراجل والست في الوقت دا، وأشرف كان رافض وجود أي شخص جنبه، وأنا المتحملة المسؤولية، وحسيت إني مش لازم أكون ضعيفة، ولازم أكون زيه، فكنت لابسة قناع أشرف في الفترة دي، وإني لازم أكون هو في الفترة دي". وتابعت: "أنا حسيت في وقتها أحاسيس كانت بالنسبة لي صعبة أوي، وكنت حاسة وهو داخل أوضة العمليات، أنهم بياخدوا قلبي مني من غير ما يقولولي إحنا هناخده، ومفيش حد غيري أنا وبنته والموضوع كان كبير أوي علينا وبسرعة، صحينا من النوم يلا هنروح مستشفى هنعمل عملية كبيرة، وأنا طول عمري عندي قناعات رافضة أن أشرف يتألم، الراجل اللي دائمًا يروح المستشفى للناس ويقف جنبهم دا ربنا هيخليه كده عشان بيعمل كده وعشانا". وأكدت: "كانت فترة صعبة جدًا وكان لازم أكون راجل وأكون أشرف زكي، وانا مرجعتش بعد الفترة دي زي منا وعلى طول بقيت متوترة وخايفة عليه، وعلى طول بقيت تحت رجليه، لأنه مهما يزعق أو يتخانق أعمل اللي أنت عايزه، لأن إحساس انك تفكري إن في حد معاكي شايلك وساندك وساند الدنيا كلها، فدا يجراله حاجه فدا شيء صعب أوي". وخلال الحلقة دخلت روجينا في نوبة بكاء شديد، اضطرت بسببها منى عبد الوهاب للقيام والذهاب لها وكسر شكل البرنامج لاحتضانها، في لقطة إنسانية. يذكر أن برنامج "أنا والقناع" هو برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+، ويستضيف عدد من الفنانين، مثل النجمة يسرا والنجمة غادة عادل والنجمة نيللي كريم والنجم شريف منير وشيماء سيف والنجم الكبير محيي إسماعيل وبيومي فؤاد وريهام عبد الغفور.
