حرصت الفنانة هنا الزاهد، الرد على أغلب أسئلة متابعيها وجمهورها عبر السوشيال ميديا من خلال "ask me" عبر خاصية "ستوري" حسابها على إنستجرام، ومنها ما تعلق بألوانها المفضلة، وأعمالها الجديدة، وكيفية اهتمامها بشعرها، والصفة التي تكرهها، وغيرها من الأسئلة. نستعرض لكم أسئلة وردود هنا الزاهد على جمهورها بالسطور التالية، وجاءت كالتالي: "إيه أكتر حاجة بتحبي تاكليها وانتي بتصوري؟"، لترد هنا: "ريزو من كنتاكي". "ما ألوانك المفضلة؟"، وردت هنا: "الأسود والأبيض وبمبي". "بتحبي تكوني إنسانة مسئولة عن حاجات ولا لأ ؟"، وردت هنا: "بحس إني إنسانة مسئولة جدا عن كل اللي حواليا، وبحب ده جدا، ومقدرش أكون غير كدة". "فيه مسلسلات جديدة هتنزل ليكي إن شاء الله قريب؟"، وردت هنا: "إن شاء الله مسلسل (سيب وأنا سيب) على شاهد". "هل ممكن تسامحي حد حتى لو أذاكي كتير؟، لترد هنا: "لا". "فيه أفلام جديدة بتحضري ليها؟"، لترد هنا: "أنا لسه راجعة من لبنان، مخلصة تصوير مسلسل، وفي فيلمين مخلصة تصويرهم بس لسه منزلوش، فأظن هاخد إجازة لنفسي شوية". "تحبي تقولي إيه للفانز بتوعك؟"، لترد هنا: "انتوا أحلى حاجة في حياتي، دائما معايا في كل لحظة، محظوظة بيكم أوي أوي، وإني عندي عيلة تانية بتحبني الحب ده كله". "إيه أكتر حاجة بتشدك في الشخص اللي قدامك أو بتلفت نظرك؟"، لترد هنا: "الطاقة الإيجابية الأول والطيبة". "بتحطي إيه لشعرك؟"، لترد هنا: "حاليا مش بحط أي حاجة بس هرجع أهتم بيه تاني.. الأكل أهم حاجة والبروتين.. النفسية حاجة مهمة جدا برضوا للشعر، وتاخد فيتامين الصح أو الحديد عندك ناقص أو فيتامين د". "إيه شعورك بعد ما الرئيس شكرك طبعا في حفلة قادرون 4 "، لترد هنا: "كنت سعيدة وفخورة جدا، وحقيقي من أجمل الحجاجات اللي حصلتلي اني قابلت أجمل ملايكة في الدنيا، وان شاء الله نشوف بعض تاني". "هل الفن غير في شخصيتك؟"، لترد هنا: "خالص، أنا زي منا وشخصيتي هي هي من ايام الجامعة والمدرسة، ودائما الناس يقولولي أوعى تتغيري وده اللي بحاول على قد ما أقدر أخد بالي منه". "أكتر صفة بتكرهيها؟"، لترد هنا: "الكدب". "أكتر ميزة أو صفة بتحبيها فيكي؟"، لترد هنا: "إني بسامح كتير ومش بفتكر الأذية، ودائما أفتكر الحاجة الحلوة اللي الإنسان عملهالي حتى لو هي بسيطة". "فيه جزء تاني ل مسلسل (أنا وهي) ؟ "، لترد هنا: "كان فيه جزء تاني بس اتلغت الفكرة وقولت أعمل مسلسل جديد وقصة جديدة اللي هينزل قريب على شاهد". "فيه جزء تاني لمسلسل حلوة الدنيا سكر؟ "، لترد هنا: "كان عندنا فكرة إننا ناخد حدوتة منهم نعملها مسلسل كامل". "بتحبي تخرجي فين؟"، لترد هنا: "أنا إنسانة بيتوتية أكتر يعني لو معنديش شغل أحب أقعد في البيت ومع العيلة أكتر من الخروج". "لسه انتي وعلي ربيع صحاب؟"، لترد هنا: "علي من أقرب الأشخاص لقلبي، وأطيب واحد في الدنيا". "بتحبي تحتفلي بعيد ميلادك في البيت ولا برة؟"، لترد هنا: "مع الناس اللي بحبهم في أي مكان". "أكتر حاجة مؤمنة بيها؟ "، لترد هنا: "مؤمنة جدا إن ربنا دائما بيعملك الخير، ودائما يعملك الأحسن وشايلك حاجة حلوة أوي انتي مش عرفاها وإن على قد مجهودك على قد ما ربنا هيراضيك". "أكتر صفة بتحبيها في اللي حواليكي؟، لترد هنا: "الحنية والراحة النفسية".
