كشفت "لميس" ابنة الفنان أحمد راتب، تفاصيل اللحظات الأخيرة في حياته قبل رحيله عن عالمنا في 14 ديسمبر 2016. وقالت "لميس" في لقاء مع الإعلامية لميس الحديدي مقدمة برنامج كلمة أخيرة عبر قناة ON: "أنا وأختي كنا ساكنين فوقه في نفس البيت، وكنا وهو تعبان في النهاية مستنيين الإسعاف تيجي تنقله المستشفى، كان عنده دور برد لكن السجائر كانت أذت الرئة بتاعته جدا، كان عنده تليف في الرئة والجزء اللي شغال جاله فيه نزلة برد عادية، فمكنش عارف ياخد نفسه". أضافت: "وإحنا مستنيين الإسعاف ابني (حمزة) كان عنده وقتها 4 سنين، فقاله: جدو أنا طلبت من ماما تفاحة ومقطعتهاليش ممكن أنت تقطعهالي؟ فقاله تعالى يا حبيبي وكان نايم قام قطع التفاحة لابني.. دي أخر حاجة عملها قبل ما ينزل من البيت، وحتى ابني عيط أوي أوي وهو نازل، وكلنا اتخضينا من عياطه وقولنا في حاجة غريبة هتحصل، وحصلت". أحمد راتب ولد في 23 يناير 1949، بحي السيدة زينب في القاهرة، وبدأ التمثيل وهو لا يزال طالبًا في المدرسة، وبعد التحاقه بكلية الهندسة، انضم لفرقة التمثيل في الكلية، لكنه لم يكمل الدراسة بها، وفضل الالتحاق بالمعهد العالي للفنون المسرحية والذي حصل منه على درجة البكالوريوس. عمل أحمد راتب في عشرات الأفلام في الأدوار المساعدة منذ السبعينيات وحتى رحيله، ومنها: "واحدة بواحدة، الحب فوق هضبة الهرم، الإرهاب والكباب، بخيت وعديلة، عمارة يعقوبيان"، كما تميز في مسلسلات منها: "السيرة الهلالية، هند والدكتور نعمان، أنا قلبي دليلي" وغيرها، ورحل عن عالمنا يوم 14 ديسمبر 2016.
