طالب الرئيس عبدالفتاح السيسي، بضرورة رفع كفاءة شبكات الطرق مؤكدًا: "شبكة الطرق بالمحافظات تتطلب رفع كفاءتها وإلا أبقى أنا مش واخد بالي، لا أنا واخد بالي كويس، ولو بنتكلم على إن رفع كفاءة شبكة الطرق داخل المحافظات تتطلب 16 مليار جنيه، احنا عاوزين أكتر من الرقم ده مرة واتنين وتلاتة، حتى يجد المواطن طريقًا مناسبًا، ودا مش موجود، ولو قلتوا لي موجود هبقى سعيد". وأوضح الرئيس، خلال افتتاح عدد من مشروعات الطرق والكباري، اليوم الأحد، أن حجم المطبات الصناعية الموجودة بالمحافظات معيق للحركة ومؤذي لأن مواصفاته غير جيدة، متابعًا: "اتكلمنا قبل كدا عن مسابقة للجامعات والمدارس قبل العام الدراسي الجديد". وتابع الرئيس: "المحافظين هيقولوا لي هنجيب فلوس منين، طيب وأنا بجيب فلوس منين؟طيب اللي بيتعمل ده منين، كل ما نقوم به في شبكة الطرق ليس بجديد، ولم نخترع العجلة، وفيه ناس كانت بتشتغل قبلنا بس الفكرة هيتعمل إزاي ويتصرف عليه إزاى؟ هل إحنا معانا فلوس زيادة فبنعمل طرق؟ هل إحنا عاملينها عشان المسابقات؟ لا عشان ناخد مكانًا بين العالم المتقدم ولإعلان قدراتنا في الاستثمار. ولفت الرئيس، إلى أنه سمع الكثير من الكلام خلال ال 5 سنوات الماضية، لكنه يعلم أنه مع مرور الوقت سيعرف الناس "اللي بيتعمل هيودينا لفين". وأضاف الرئيس: "نحن بحاجة إلى مسابقة للطرق داخل المحافظات، تستغرق من 3 أو 6 أشهر، ونشوف المحافظات هتساعد نفسها إزاي عشان يعرفوا إن مفيش حاجة بتتعمل كدا، وكل واحد يعرف هو فين من الطرق، ولو قصرنا إنتوا كمان هتقصروا مع محافظتكم".
