اسمي محمد عبد السلام، 24 سنة، تخرجت من في كلية الهندسة، شاركت من يوم 25، لأنى كنت مقتنع بفكرة التغيير، وكان نفسي وضع البلد يتحسن". البلد حالتها وحشة،و مستواها كل شوية بينزل، فقررت أنزل وأشارك، عشان صوتي يوصل، ونزلت فعلا لكن لقيت العدد قليل، ومش زى ما كنت متخيل، بس كنت متفائل لأن تونس عملتها قبلنا، البوليس فى اليوم ده حاول يفرقنا كتير، بس إحنا كنا بنتعامل معاهم باحترام، لأنها مظاهرة سلمية وكلنا خارجين لهدف واحد، وروحت اليوم ده على الساعة 8 بالليل". نزلت تانى يوم الجمعة 28، وبينما كنت بصلي فى الجامع، لقيت اتنين أمناء شرطة جم قالوا للشيخ خلي الناس تروح، لأن اليوم ده قلق، بعد كده طلعت قابلت صحابي، وكنا متفقين نروح، اتحركنا إحنا الستة وبدأنا ندوّر على مظاهرة ننضم ليها، لحد ما قابلنا مظاهرة في شارع محيي الدين، حوالي 30 واحد، وطول ما إحنا ماشيين كنا بنهتف ونقول "يا أهلينا انضموا لينا"، عشان نحمس الناس للنزول". "ولما وصلنا كوبري 6 أكتوبر، لقينا عساكر الأمن المركزي بيرموا علينا القنابل وماكنتش عارف أعمل إيه، جريت ودخلت صيدلية، وناس كتير معايا، والدخان عامينا، بعد شوية خرجنا من الصيدلية، وحاولنا نتجمع تانى، وكل ما يرموا علينا قنابل، الأهالي في العمارات يرموا لنا بصل وخل، وبعد محاولات كتير قوي قدرنا نعدى منهم، ورحنا عند ميدان الجلاء، وبعدين كوبري قصر النيل، ودي كانت أكبر مجزرة بجد، قعدوا يضربوا خرطوش وقنابل كتيييير قوي، واتفرقنا، ونزلت من النزلة اللي عند الحزب الوطني، وكان فيه ناس كتير قوي بتقع على الأرض، وأنا بجري لقيت واحد مغطينه، قالو لي إنه متعوّر ومش عايز حد يشوفه عشان الناس ماتخافش وتكمل". "كمّلت وجريت لغاية قبل الحزب كده، وعربيات الأمن المركزي بتجرى ورانا ، كنا بنحط طوب قدامهم عشان مايعدوش، وواحد من اللي بيحطوا الطوب، داست العربية عليه ومات في لحظتها، ده غير العربية اللي خبطت عربية نقل في وسط الطريق كان فيها أطفال وأمهم، ماتوا كلهم، ولما وصلت التحرير اتفرقت عن صحابي، وروحت البيت الساعة 11 تقريبا". "بعدها بشوية لقيت حد بيتصل بيا الساعة 3 من القصر العيني، وقال لى تعالى خد صاحبك، نزلت أنا ووالدي ورحنا ندوّر عليه، وسط المصابين الكتير، وأخيرا لقيته، كان وشّة من غير ملامح خالص، لدرجة إني ماعرفتوش غيرمن لبسه، وقال لي إن 9 عساكر نزلوا عليه ضرب، و قالوا له إحنا مش هنسيبك،و خدته وروحته" وكنت بقف في اللجان الشعبية، لكن ما كنتش قادر أنزل المظاهرات، وعدت الأيام وكنت حاسس بجد إنى بعمل حاجة، وإنت داخل الناس بتستقبلك في الميدان، والناس اللي بتنضف، ولو حتى إنت مش رايح تعمل حاجة، الروح اللي هناك هتخليك تساعد، وكانت فرحتنا الكبيرة يوم التنحي، ونزلت بعدها ننضف الميدان". "واللي بتمناه إن الروح دي تفضل على طول، وتفضل مصر مرفوعة الراية قدام العالم كله، ومانبقاش درجة تانية تانية، أنا قبل الثورة كنت هسافر ومحضر الورق، بس دلوقتى رجعت أفكر في الموضوع ده، وبقيت متفائل والحمد لله.