قال الحكيم اللمبى فى احد افلامه معلقاً على حسن حسنى عندما قال له عملنا لك عملية نقل مخ ، قاله انا طول عمرى اسمع عن نقل الجيزة ، نقل اسكندرية ، انما نقل مخ " جديدة دى " كلنا سمعنا عن حادث كنيسة اسكندرية المروع ، وشجبنا ونددنا وصرخنا وأخيرا قلنا اصل دى جريمة مستوردة ، وانا هنا هأقول زى ما قال اللمبى انا طول عمرى اسمع عن تفاحة مستوردة ، بلوزة مستوردة ، جلابية مستوردة ، انما جريمة مستوردة " جديدة دى " يا مصريين كفاية بقى تضليل للحقيقة ، لو هى مستوردة فعلاَ ، اللى أعرفه علشان تستورد حاجة لازم يكون ليها سوق ، ولو ملهاش سوق اعملها تسويق واخلقلها سوق ، اللى اعرفه عن الاستيراد لازم يكون فى شركة بتصدر وأخرى بتستورد ، وكمان لازم يكون فى قوانين بتسمح بالاستيراد و لازم كمان يكون فى ناس بتقوم بالعملية دى ، ولازم تصريح بالاستيراد ، وبيئة تسمح بكل ده ، لو الجريمة دى مستوردة ! مين اللى استوردها ؟ ولو مكنش فى سوق ليها مكنش حد اصلاَ فكر فى استيرادها ، ولو مكنش فى بيئة متخلفة تقبل كل شئ بدون فحص او تدقيق مكنش بقى ليها سوق ، ولو مكنش فى قوانين متعطلة ومش متنفذة وقوانين من مائة سنة عدى عليها الزمن مكنش قدر حد يستوردها ، ولو مكنش فى جهل وفقر مكنش حد اشتراها ، لو مكنش فى ناس من جوه مصلحتهم فى استيرادها مكنش حد استوردها ، لو الناس اللى بتصدر ملقتش حد يستورد مش هتصدر ، لو كانت القوانين ببتنفذ مكنش ده حصل ، لو كنا بنقبل بعض وعارفين ان فيه حد تانى ممكن يكون مختلف بس هو كمان انسان وليه حق يعيش ويصلى ويعبد ويعترض ويوافق مكنش ده حصل ، لو كان فيه تماسك ووحدة وطنية بجد مش مجرد شعارات مكنش ده حصل ، لو ضربنا بأيد من حديد على من فعلوا جريمة نجع حمادى مكنش ده حصل ، لو كنا مؤمنيين بكلام الله اللى قال " وَلَوْ شَاءَ اللَّهُ لَجَعَلَكُمْ أُمَّةً وَاحِدَةً " صدق الله العظيم ، مكنش ده حصل، لو ضربنا بأيد من حديد على كل من يقوم بمظاهرة يندد فيها بدين الآخر وبشخصيات دينية عملاقة مكنش ده حصل ، لو سكتنا الفضائيات اللى ليها مصلحة فى اشعال الفتنة مكنش ده حصل، لو قطعنا أيد اللى بيكتب فى الجرايد بدون رقيب او محاسبة مكنش ده حصل. فى النهاية عاوز اقول لما نشاور على الناس الى بره مش هيفدنا بحاجة علشان واحنا بنشاور بصابع علي اللى بره فيه تلاتة صوابع بيشاورواعلى اللى جوه ، خلينا نشوف احنا بنعلم ولادنا ايه واحنا نعرف ده حصل ليه. للتواصل مع ايهاب ماجد [email protected]
