سر نجاحي : بقسم السنة ل "كورسات".. وكل شهر بخصصه لحاجة شكل. مؤلف و سيناريست و مخرج سينمائي و مسرحي و تليفزيوني و مترجم و صحفي و شاعر و ملحن و ناشط سياسي و أخيرًا مدوّن، و الجميل إنه مميز في كل مجال من المجالات دي، إزاي "خالد الصاوي" بيقدر يعمل كدة؟! إزاي بتقدر توظف وقتك وتعمل حاجات كتير؟! "الفن هو حياتي.. وما فيهاش حاجة تانية.. و إنا الحمد لله سبحانه وتعالى منظم و بدي لكل حاجة وقتها، الفن هو اللي بيحرك مشاعري و رؤيتي للدنيا والمجتمع.. و عشان كمان مش متجوز.. يعني مليش في فني شريك ". إزاي حياتك كلها شغل و تخطيطات و مشاريع ومع ذلك مش بتبعد عن الناس ؟ "لأني بقسم السنة ل "كورسات".. يعني كل شهر مثلا بخليه لحاجة معينة". علاقتك بأصحابك شكلها إيه؟ "أعشق التوازن بين الصداقة والاستقلالية الفردية.. لأني لا أحب أن يذوب وقتي بالكامل في الثرثرة". اتعرضت لخيانة من صديق قبل كده؟ "نادر.. بس حصل". و قبل أن يبدأ الممثل في شرب كوب القهوة الصغير الذي جاء بها مساعده الخاص وجهت له سؤالي : صرحت في إحدى القنوات الفضائية إن لو كان ليك بنت في الإعدادي ما كنتش هتقبل دور " حاتم رشيد" الصحفي الشاذ في "عمارة يعقوبيان".. التصريح ده مش متناقض نوعًا ما مع تحمسك الشديد للدور.. وكلامك الدائم عن حرية التعبير و الثقة في رأي الناس ؟ "أنا قلت وارد .. و الكلام كان عن الفنانين اللي رفضوا الدور.. فأنا قلت ماحدش يلومهم لأنهم معذورين.. ليهم بيوتهم و زوجاتهم و أولادهم.. ووارد جدًا حد يضايقهم بعده.. لكن أنا أعزب ولا توجد لدي الضغوط التي عليهم.. ووارد لو كان عندي بنت في سن زواج مثلا كنت هفضل إني ما أعملوش". محبي "خالد الصاوي" كانوا قلقانين من شخصية "بلعوم" و يا ترى إزاي هيظهر في دور مطرب شعبي هابط.. يا ترى إزاي قدرت تقدمه بهذا الإتقان دون أن تتخلى عن الاحترام و الرقي ؟ "ده كان شبه التحدي مع " حاتم رشيد ".. إني أدخل في منطقة شائكة أخلاقيًا و دينيًا و اجتماعيًا.. لكن إزاي أقدمها.. وبقدمها ليه.. و في رأيي إن الجرأة لا تعني الوقاحة.. و لابد أن يكون وراءها هدف إيجابي و إلا تحولت إلى فجاجة!". متخيل نفسك إزاي بعد عشر سنين؟ "فنان شامل متمرد.. ولكن أكثر رسوخًا بإذن الله". بتفكر إزاي في موضوع البطولة المطلقة؟! "و الله أنا عايز أقدم للناس حاجات حلوة، و بقدر الإمكان مفيدة، و لو الناس عايزة تشوفني بطل هكون بطل، لأن المخرجين و المنتجين بيرضخوا لإحساس الناس، و لو جالي مثلا بعد "أدرينالين" دور تاني جيد.. و بيقول حاجة.. هقبله". تعليقك إيه على بعض الأقلام اللي بتهاجم أي فيلم يظهر ويمس أوجاع الناس بحجة "سمعة مصر"؟ تنهد مهمومًا و انطلق في الحديث : "الأقلام دي ضلت طريقها لصاحبة الجلالة.. و أطالب نقابة الصحفيين بعمل تحقيقات مع كل صحفي يستسهل إطلاق اتهامات خطيرة من هذا النوع.. لأن المزايدة على الوطنية شيء منحط.. أنا مش هقبل إن حد يوجه لي تهمة زى دي بعد أكتر من عشرين سنة في الحركة الوطنية". عاكست بنات قبل كده؟ "حاولت في سن المراهقة.. واكتشفت أني فاشل في السكة دي!" لو شفت في الشارع ولد بيضايق بنت..هتعمل إيه؟ "على حسب حجم ما قام به والظروف المحيطة.. لكن هناك مرات لَطّشت فيها للشخص الوقح علنًا". و كان الختام مسكًا مع شاعر يعزف على أوتار النفس و الروح بمهارة وسلاسة، جاءت نعومتها من حدته ووهجه الشديد و ثقافاته الواسعة. كتبت "من هذا الهامش من أعلى لحظات الضعف ..يزحف شعري جيش" إيه الهامش القوي أوي ده في حياة "خالد الصاوي" ؟ "أنا كتبت ده في فترة كنت حاسس فيها إني مش معروف بين الناس.. و إن تعبي و مجهودي ملوش وجود.. وما دمت مش حاسس إني أثرت في الناس زي ما بتمنى.. فمن حقي أحس إني على الهامش". و عندما ظننت أن الحديث انتهى، ظهر بالمجلس فجأة "خالد جمال الصاوي" الإنسان ، يتخذ مجلسه في المكان بتواضع و تلقائية شديدة، تشعرك بالارتياح لدرجة تدفعك للشروع في تحديد موعد آخر للحديث معه وحده باستفاضة، لكنى اكتفيت بسؤال واحد خرجت به من حديثي مع الممثل و الشاعر و السياسي. الفن في حياة "خالد الصاوي.. قدملك إيه ؟ و خد منك إيه ؟ " قدم لي معنى وجودي.. و خد عمري" نشر في مجلة كلمتنا 10 2008
