بمناسبة افتتاح خط مترو جديد.....عايزة اعرفكوا شوية علي الخط الأول (المرج – حلوان) من مترو القاهرة.... برغم إنه مشروع مذهل وعبقري و بيخدم ناس كتير جداً!!!!.....لكن اللي بيحصل في المترو يوميا كفيل إنه يكرهك في اللي فكر يعمل المخروب دة في يوم من الأيام!!!!.....تنزل من بيتك 8 الصبح وعامل حسابك علي يوم جديد كدة بابتسامة عريضة علي وشك :).. وباين عليك منتهي النشاط والحيوية اللي في الدنيا....و أول ما توصل محطة المترو تدورلك علي أي جنية حق تذكرة المترو :D....تعدي التذكرة في الماكنة وتبص لموظف الأمن وتضحك في وشة وتعرفة انك عديت بالتذكرة وتتأكد انه خد باله ;) .....وفجأة تبص تلاقي المترو جاي والناس كلها ظابطة نفسها علي الأبواب ......ويالا استعدواااااا.....تحضر نفسك علي انك هتركب....تلاقي سيل من البشر نازل من المترو في المحطة..... والناس بتزق بمنتهي القوة عشان تنزل......تيجي انت تطلع...تلاقي أعداد أكبر عايزة تطلع....تتزق علي جوة معاهم..... و لو قاومت هيزقوك ويطلعوا هما و استني انت اللي بعدة بقي يا معلم :P:P ..... و ممكن احتمال تاني ان ينزل واحد بس ويطلع تلاتة ....اه اه عادي واحد مكان اللي نزل وواحد حالف ليطلع والتالت دة واحد زقة من برة وقالة روح انت وانا هحصلك (قال يعني الواد صاحب صاحبه ومجدع)..... :D:D لما بتركب المترو سعادتك بتلاقي أشكال و ألوان من البشر......مش بس موظفين ولا طلبة مدارس وجامعات....لأ دة اكتر حاجة بتميز المترو وجود عدد رهيب من البياعين والمتسولين.....البياعين بيبيعوا كل حاجة ممكن تخطر علي بالك من أول أكياس المناديل و الشوكولاتة والبسكوت واللبان والنعناع والجرايد و السوبر جلو ومقوار الكوسة لغاية مفارش الغسالات والتلاجات والهدوم والماكياج وبيتميز البياعين بالرخامة والغلاسة اللي مش موجودة في حد....بيطلع البية يرمي بضاعتة علي حجر اللي قاعدين ويرجع تاني يلمها..... ونادراً أصلاً ما حد بيشتري منهم حاجة ....والمتسولين بردو بيتسولوا بكل الطرق المتاحة اللي في الدنيا من اول بردة أكياس المناديل ومرورا بقي بالعاهات والكسور والعكاكيز والتهتهة والتفتفة و أحدث الطرق يا معلم....عيل عندة بتاع 9 سنين يرمي علي رجليك ورقة مكتوب فيها (أنا اسمي محمد، بابا مات في حادثة العبارة، وأمي اتعمت لما عرفت الخبر، ,اخويا الصغير عندة ايدز...وأنا نفسي أكمل تعليمي).....يا ساتر يا رب :( عربية الستات بقي كووووم والمترو كله كوم و بما اني خبرة أكتر في عربية الستات هحكيلكوا عن الستااااااااااات و عمايل الستات , :S:S:S اول ما بركب في أمان الله .....ألاقي ست بتسألني بنرفزة جامدة جدا (نازلة الجاية ) ....أقولها (لأ يا طنط دة أنا لسة طالعة).... تقولي (طب تعالي مكاني يا إما هتزقي لما الباب يتفتح) وفي عينيها نظرة شر.....طبعاً الواحد لازم يلم نفسه ويحاسبلها .....وفي نفس الوقت تلاقي واحدة ست تانية تقوم بصالك فجأة (عمالة تزقيني من الصبح وأنا ساكتة.... ضهري والله هيكسر.....أففففففففففففف)....(معلش أنا آسفة يا طنط).... بس أنا مش فاهمة يعني الدنيا زحمة خلقة ومش ناقصة يعني....و مش كل واحدة تبقي واقفة مش عايزة حد يلمسها ولا ييجي جمبها.....دي حاجة غريبة أوي بجد يعني نستحمل بعض شوية..... وهتفرج إن شاء الله ... المشكلة الجوهرية اللي بنقابلها في المتروهي الزحمة.....والمشكلة الأعظم إن الزحمة بتأثر تأثير سلبي جداً علي انتاج الناس وكفاءتهم وشغلهم... ولازم مشكلة الزحمة تبقي من الأولويات اللي الدولة بتبصلها ,في حل بسيط جداً من غير تكليف الدولة أي نفقات : تقسيم أوقات العمل و الدراسة علي فترات صباحية ومسائية عشان الموظفين والطلبة يتوزعوا علي المواصلات لفترتين ومتبقاش دايماً أوقات الزحمة هي مواعيد الشغل والدراسة و أوقات الخروج وبكدة هنضمن إن الناس تبدأ يومها وتخلصه بطريقة آدمية ......
