كلمة بنسمعها كتيييييير لدرجة إننا بقينا "بنبص" من غير ما تتقال، خلاص اتعودنا يعني ألاقي صاحبي جاي علي مبتسم، ومش باصصلي خالص فأبحث حولي أدورعليها: هي فين؟ إيه يا عم ما تركز البنت اللي جاية هناك دي؟ ((بص ياض)) (( بص لابسة إيه دى جامدة طحن)) لا طحن إيه دي جامدة آخر حاجة. ويقعد يتغازل في جمالها وأسمع منه قصيدة شعر رغم إنه عمره ما حبه و دماغة اتلحست وعنيه مش شايفة غيرها،وأول ما تمشي علي طول ألاقي دماغة اتلوحت الناحية التانية وتتطلع الجملة الفظيعة ((بص البنت دي)) وتبتدي الحكاية من الأول. وآه بقي لو طلبت معاه وراح يكلم واحدة وتطلع مصاحبة بقي ونلاقيها راحت لمتلنا ناس وتجيلنا خناقة من الهوا وكل مرة نضرب واللي يغيظ أكترإن صاحبي اللي كان بيعاكسها ما بيبقاش في الخناقة أصله مش فاضي بيدورعلي واحدة يعاكسها في حتة تانية بعيداً عن الخناقة أصلنا بنبقي عاملين دوشة وهو مش بيعرف يعاكس كويس؟ ومبقاش عارف بقي هواللي غلط زي ما اتعلمت ولاأنا اللي غلط ما هومش معقوله تبقي الشباب كلها غلط وأنا بس اللي صح. ماهو أنا اتعلمت كده برضه، لإنه ما ينفعش إني أبقي بس اللي صح والناس كلها تبقي غلط؟ طيب الغلط فين فيّ، ولا في التلفزيون والفضائيات ولا في الشباب ولا في البنات ولا البيضة ولا الفرخة.. وأقعد ألف حوالين نفسي زي العبيط وزي ليه، المهم في الآخر أديني باسمع الكلام وبابص ولا هي جت عليّ..
