ياحضرة الجنرال ماتخافش م الهلفطة دا احنا اللى بنلاعب الإنس ويا الجان أساتذة ف الصفقات وُعلما ف السفسطة واللى عينيك شايفاه ده زوبعة ف فنجان ياحضرة الجنرال انا وانت دافنينه هاتها ف طرف تالت واهو قطمه ولا نحته إيه يعنى كام واحد حرمته من عينه وهوّ إيه وداه .. مايفوق لمصلحته ياحضرة الجنرال لا تخاف ولا تقلق وبيك ومن غيرك كانوا برضه حيموتوا طلقة رصاصك سبب والموت علينا حق واللى يقول حقى رح نشترى سكوته ياحضرة الجنرال وفي لنا بوعودك واحنا كمان نوعدك ح نغرقك ف الغزل كتير عملناها .. زمان مع جدودك ودى حيلة متجربة ومن قديم الازل ياحضرة الجنرال بكره ح تتعدل بس اوعى كما عادتك تعملها وتبيعنى أصل انت ليك أوقات تقلب وتستندل ياما وقفت معاك وألاقيك بتخدعنى ياحضرة الجنرال سوق الهبل واحْوِد إنت تظبطنى وانا ليك ح اكون ضامن دا شعبنا نساى وقلبه مش إسود بكره تلاقيه طالع يهتف خروج آمن ياحضرة الجنرال وياحضرة الطمعان زمانكوا ولىّ وجَبَر وماعادش تانى سكوت خدو م اللى فات عِبره واقروه كده بإمعان الشعب دا بيعيا .. لكنه مش بيموت