مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة، ابعت انت بس واسأل عن اللي انت عايزه على.. [email protected] أنا لسه في ثانوية عامة وهادخل هندسة قناة السويسالاسماعيلية إن شاء الله لو جبت مجموع، بس انا مش عارف أدخل قسم اتصالات ولاّ حاسبات؟، لأني مش عارف كل قسم إيه لازمته، أو بندرس فيه إيه، وبعد كده ممكن ايه اللي نشتغله لما نتخرج؟ يعني ال job description هتبقى إيه؟ و هل بتاع اتصالات ينفع ياخد دورات، ويبقى زي بتاع الحاسبات، أو العكس؟ (عنده المهارتين يعني؟).. و حاجة تانية معلش، اللي بيشتغلوا في تأمين المعلومات، و"الهاكرز" برضه بيكونوا دارسين إيه؟ يعني كلية إيه و قسم إيه؟ انا ما لجأتش ليكي غير لما دخلت على جوجل وإتبهدلت، وسألت ناس كتيرة، وحاولت أدخل الكلية وأسأل، بس ما لقيتش حد، وما فهمتش حاجة بعد كل ده يا ريت لو عندك وقت تردي عليا، أو لو يعني مش عندك المعلومة تخلي أي حد يرد عليا بدالك.. أنا آسف تاني مرة إني أزعجتك ملحوظة : أنا جايب 97% وعندي لغة إنجليزي كويسة، وحبة فرنساوي، وناوي أكون حاجة في البلد دي، أو برة، يعني أنا بخطط كويس.. فَياريت متقوليش ركز في الثانوية الأول عشان الكلمة دي بتعصبني وبسمعها كل ما بسأل حد. و شكراً لو قدرتي ترشديني، أو لو مَعرفتيش حتى شششششككككككككككررررررررررررراااااااااااااااااااااااا خليني أجاوب عليك من الآخر للأول، يعني مش هقول ركز في الثانوية العامة الأول، عشان واضح إنك مخطط وعارف إنت عايز إيه وبالشكل ده انت مش محتاج نصيحتي تركز علي ايه ... بالنسبة للتخصصين اللي انت بتتكلم عليهم.. الموقع بتاع الكلية موضح كل التخصصات بالتفصيل، حتي كمان عدد الساعات الدراسية وكل حاجة، أكتب اسم الجامعة على جوجل، هيطلع لك موقع الكلية و فيه كل المعلومات المطلوبة .. من حيث المواد والتخصصات المتاحة، وأسماء الأساتذة والمنح وكل حاجة اختار أي تخصص ... انت بتحب ايه أكتر؟.. يعني لو بتحب البرمجة والكمبيوتر والحاجات دي، يبقي طبعا تروح علي حاسبات.. أما لو بتحب الاتصالات، عندك شبكات الموبايل والإذاعة والتلفزيون وحاجات كتير جدا بتخش تحت إطار الاتصالات. وبالنسبة لموضوع - – job description أدخل علي جوجل وأكتب Computer engineers – job description أو communication engineers – job description و بكده هتتعرف علي مواصفات كل وظيفة، وهي بتعمل إيه بالظبط ... بالنسبة لموضوع إن مهندس الاتصالات ياخد كورسات ويجمع بين التخصصين حاسبات واتصالات، في الحالة دي إنت محتاج تليفون صغير للمسئولين عن قسم اتصالات في الكلية.. ممكن تقول لهم انك بتعمل بحث عن التخصصات المتاحة، ومحتاج معلومات تدرجها في البحث بتاعك... اعتبر نفسك صحفي يعني وبتعمل مقال لمجلة المدرسة، وهمَّ ان شاء الله هيجاوبوك علي كل استفساراتك.. بس قبل ما تتصل.. اكتب كل الأسئلة قدامك وحضر للقاء كويس، علشان مَتجيش ساعة المكالمة وتتلخبط أو تنسى أي سؤال، كمان وانت بتسمع الإجابات خلي جنبك ورقة وقلم، وسجل كل الإجابات اللي هيقولوا لك عليها... علي فكرة أنا عملت كده في إحدي الجامعات مرة، يعني الطريقة متجربة.. هي بس عايزة شويه لباقة و حسن تصرف علي فكره انت ممكن تعمل نفس الفكره مع شركات التكنولوجيا والاتصالات، علشان تعرف أكثر عن التخصص وفرص العمل المتاحة. ربنا معاك إن شاء الله.. وركز في الثانوية العامة وكمل الخطة، وإوعي حاجه توقفك وتخليك متكملهاش بنجاح.. و علي فكره الناس اللي بتفكر زيك كده.. هم دول اللي بيكون ليهم شأن.. اوعي تصدق أي حد يقول لك غير كده. تحياتي
