بحبك يا أمَّهْ لكن قلبي مش صافي بحبك أيوه بس العمر مش كافي أشيلك يوم على كتافي وأطير بيكي وأقوم وقت الصلاة بإيدي أوضيكي ووقت البرد أغطيكي بلحمي عشان يدفيكي بحبك يا أمَّهْ بس القلب مش طايق يشوفك واقفة مكسورة ومقهورة وكل الخلق بتشاور عليكي وإنتي مجبورة وراسمة من الألم بدل الكلام صورة بحبك يا أمَّهْ نفسي في يوم أقولهالك بعلو الصوت وأنا مبسوط ومش خايف ولا مربوط ولا متسلسلة إيديا ولا شايف بعيني الفتنة حواليا بحبك نفسي أكتبها ف كل مكان على سطوحي وعالبيبان على جبيني وعالحيطان على الزرعة اللي لونها أخضر في قلب الغيط وعالنور اللي طالع لسه من عيني بحبك نفسي ترويني ووقت ما أخاف تخبينى تحابى عليا تحمينى من الغربان وم الغيلان ولما أحس يوم بالبرد أرجعلك تضمينى بحبك يا أمَّهْ كفاياكي تصديني بحبك يا أمَّهْ نفسي في يوم تجاوبيني على سؤالى لو القلب إرتمى ف حضنك وكان مكسور وأشلاؤه على إيده ودمه بيجري منه بحور هتبكي وأرضك الطاهرة عليه هتثور ؟