كلمات مندوبين المبيعات بترن في وداني ( معايا ولاعات سخانات تولع بيها سجايرك ..الست الوالدة في المطبخ ..المدام تولع فيك ) , أنا كمان معايا كلمتين تصلح البلد ..تريح القلب ..ترسم الضحكة ..تصفي الروح ,معايا أحلى كلمتين تقولهم لأختك ,لصاحبك ,لواحد غريب في الشارع أو في الشغل أو في المترو .تقولهم لنفسك صدقني بيهم ترتاح بيهم هتريح بيهم كلنا هنبقى مبسوطين. قررت أكتب المرة دي بالعامية لأن أولا وحشتني جدا , ثانياً لأن الكلام اللي بقوله هنا مينفعش غير بالعامية ولا يخضع لقواعد لغوية وأي مصحح لغوي هيحط ايده فيه هقطعهالوه ...أنا آسف ايه اللي أنا بقوله ده , أول كلمة معايا النهاردة كلمة آسف , آسف كلمة مهمة جداً في حياتنا أولا هي خفيفة أوي على اللسان ,ثانيا وده الأهم ممكن تتفادى بيها مشاكل كتير أوي ,كام مرة وأنت واقف في المترو والدنيا زحمة جه واحد وغصب عنه داس على جزمتك ومشي ولا كأنه هنا وأنت أد ايه أتعصبت , مع أنه لو كان بص لك بس وقال ( معلش ..أنا آسف ) كنت على طول هتقوله وأنت بتبتسم لا لا ولا يهمك . طيب كام مرة وأنت ماشي بعربيتك جه واحد كسر عليك ومشي وأنت هتموت من الغيظ لأنه كان هيلبسك في الحيط , مع أنه لو بعد ما عدا طلع ايده من الشباك وشاور لك أو بعد ما عدا هدا شويه ونزل الأزاز وقالك أنا آسف ..هتسامحه على طول . كلمة آسف لماما بعد التأخير باليل , كلمة آسف لمديري على تقصيري في كتابة تقرير امبارح , كلمة آسف لكل واحد اتسببت في جرحه أو أذيته سواء قصدت أو لأ , كلمة آسف لحد مات وملحقتش تقولهاله ...كلمة آسف لنفسك عشان قصرت في حقها وظلمتها ومكنتش فعلا جنبها وقت ما كانت محتجالك ..كلمة آسف على وقت ضيعته بغباء في فعل ولا يسوى شئ . كلة آسف تقفل بيها صفحة قديمة وتفتح بيها صفحة جديدة هنقول فيها بسم الله الرحمن الرحيم ومن أول السطر ......( شكراً ) شكراً على كل شئ وأي شئ لأن كفاية منك ابتسامه , ابتسامه وكلمة شكرا تفتح أبواب كتير أوي متقفلة وقلوب كتير أوي كانت قربت تنسى يعني ايه كلمة شكراً , لو قلت شكرا لل ( الأوفيس بوي ) وهو جايبلك النسكافيه الصبح هيعملك بتاع بعد الضهر أحلى وهيبقى عاوز يخدمك بعنيه , كلمة شكرا لمراتك هتطيرها من الفرحة لأنها هتحس بقيمتها جدا وهي بتسمع جملة ( شكراً لأنك موجودة في الحياة) , كلمة شكراً لأبوك لأنه رباك وعلمك وحافظ عليك , كلمة شكراً لصاحبي اللي وقف جنبي حتى في أتفه الأمور . كلمة شكراً نبدأ بيها كل جملة ,بمناسبة أو من غير مناسبة وأرجوكوا خلوا معاها ابتسامه ولو صغيرة , تعالوا على نفسكوا شويه . تعالوا كده من النهارده نبدأ كل كلامنا بالكلمتين دول ( آسف ..شكراً ) ونبتسم في وش بعض , أولا الدين الأسلامي وأي دين تاني خلقه ربنا بيقول كده , بيقول أن البنآدم بأخلاقه وقمة الأخلاق أنك لما تغلط تعترف ولما حد يقدملك أي شئ أو خدمة تشكره ..لا هيكلفك فلوس ولا تعب بس هيفرح اللي قدامك ويسعده . آه صحيح أنا كاتب كلام من قلبي لا ليه علاقة بالصحافة ولا قواعد الكتابة ولا أسسها ,عشان كده رجاء لا تعملي لايك ولا تعليق , أرجوك لو شايف أن الكلام مش عاجبك قول آسف ولو الكلام عاجبك قول شكراً , آسف أني أخدت من وقتكوا وقريتوا الكلام ده وشكراً لأنك قريت وكملته للآخر .