احنا نقدر نعمل حاجات كتير اوي..نقدر نجبر التجار الجشعين الحرامية اللي بيستغلوا حاجة الناس ويرفعوا الأسعار بطريقة جنونية علي خفض الأسعار زي ما احنا عاوزين..نقدر نقاطع الشراء لمدة أسبوع ونجبر الجميع علي البيع بالاسعار الحقيقية ..مستحيل يكون فرق سعر بيع سلعة من مكان لآخر اكثر من 30جنيها وتقولي العملية عرض وطلب..في حاجة غلط ولو الدولة مفيش عندها إمكانيات لضبط السوق لازم الشعب يتدخل ويعمل زي كل الدول المتحضرة..اولا لازم نغير ثقافة الشراء وتشتري الحاجة يوم بيوم بدل ما احنا بتشتري بالخمسة كيلو وبعدين نرمي نص الحاجة..التاجر لو البضاعة قعدت عنده لنص اليوم هيبيعها بتراب الفلوس وبردو هيبقي كسبان..نقدر نقاطع الشراء وعمرنا ما هنموت من الجوع..سندوتش الفول زي سندوتش الكباب كلة بيشبع..نقدر نلغي العادات السيئة في المواسم..يعني بلاش حلاوة المولد لان عندنا ازمة سكر وبدل ما نشجع التجار علي جمع السكر من السوق وبعدين يرتفع سعره.. احنا نقدر نقاطع حلاوة المولد وساعتها التاجر يبقي يفرقها علي الحبايب ويتحمل الخسائر نتيجة للجشع والاستغلال..نقدر نطالب بحقنا ونقول للتجار ان الأسعار دي غالية جدا لا تتناسب وتغيير سعر العملة..انا وانت موظفين يعني دخلنا ثابت ما نقدرش نتحمّل فواتير الكهرباء والمياه والغاز والنقل وكمان هامش الربح المضاعف من التجار..انا متاكد ان احنا نقدر نغير الامر الواقع اللي التجار عاوزين يفرضو علينا..لو اتفقنا كلنا هنظبط السوق من غير تدخل اي حد بس نتمسك بحقوقنا..دي إمكانيات البلد في هذه المرحلة ولازم كلنا نشتغل مع بعض..بلاش ندفع رشاوي علشان ما نشجعش علي الفساد حتي لو هنتعب شوية بس في الاخر لازم ناخذ حقنا..بلاش نمشي في الشوارع بطريقة همجية وبعدين نقول دي ازمة مرور..كل واحد فينا يقدر يصلح حاجة ينفذ فورا مش لازم نعتمد علي بعض.. خلينا نعتمد علي أنفسنا وتكون تجربة لو نجحت هنكسب ويكون لينا الكلمة العليا..اللي بيرمي الزبالة في الشارع ويقول البلد مش نظيفة يسال نفسه هو بيعمل ايه الاول ..بلاش كلمة يعني هي جت عليا..الدول مش بتتقدم بالحكومات بس.. لا دي بتتقدم بسلوك الشعب واحنا الحقيقة شعب بيحب الكسل والاعتماد علي الغير وبنصدر السلبية لبعض من غير ما ناخذ بالنا..في جميع الدول الغنية والمتحضرة الشراء بالجرام وليس بالكيلو..مش عيب وبلاش الفشخرة الكدابة..نقدر نحافظ علي الكهرباء ونقدر نقلل استهلاك البنزين ونوفر في المياه..البلد الوحيد في العالم اللي الشعب بيغسل العربيات فيه بمياه الشرب هي مصر..والبلد الوحيد في العالم اللي الشعب بيعدي الطريق من اي حته برضو مصر..صدقوني العيب مش في الحكومة بس.. العيب فينا ولازم نعترف علشان نقدر نغير الواقع..جربنا كل حاجة غلط ومنفعش تعالو نجرب الصح ولو مرة واحدة ونعتمد علي أنفسنا..تعالو نشتغل بضمير ونستحمل بعض ونبطل نسرق بعض يمكن ربنا يكرمنا ونخرج من الازمة..حملة المقاطعة التي أطلقها جهاز حماية المستهلك بداية شهر ديسمبر ليست بدعة ولكنها تطبق في جميع الدول في حالة حدوث انفلات في الأسعار..ونحن والحمد لله لدينا تجار جشعين وعلينا ان نتحرك وبسرعة مثل الدول المتحضرة ونعلن المقاطعة بس والنبي يبقي قلبنا علي بعض وخلونا نعمل حاجة ولو مرة واحدة بضمير وساعتها هنشوف الأسعار هتبقي عاملة ازاي..دعونا نبدأ التجربة وننتظر النتيجة..وتحيا مصر.