لازم نستحمل علشان الظروف صعبة قلنا ماشي..لازم نعوم الجنيه علشان نقضي علي السوق السوده قلنا ماشي..البنزين لازم يزيد علشان ماينفعش الغني ياخد حق الفقير قلنا ماشي..رشدوا استهلاك الكهرباء قلنا حاضر..رفعنا أسعار الغاز والكهرباء والمياه قلنا مفيش مشكلة..أسعار السلع بالكامل ارتفعت للضعف قلنا ندفع ونيجي علي نفسنا لا عيب ولا حرام.. مفيش زيادة في المرتبات رغم ان المواطن هو وحده من تحمل جميع انواع الزيادات قلنا البلد في أزمة وعاوزين يركعونا واحنا شعب بيستحمل اكتر من كده وهنستحمل ..انا كل خوفي ان تكون هذه الحكومة تعلمت الصعود بالطائرة ولم تتعلم الهبوط.. دي تبقي مصيبة سودة.. خلو بالكم احنا بندفع تمن مشاريب لا شربناها ولا نعرف عنها حاجة.. يعني شوية الحرامية اللي قعدوا يسرقوا البلد 50سنة لِسَّه موجودين وهما دول الاغنية اللي لازم يدفعوا الجزء الأكبر من فاتورة المشاريب مش احنا بس هنستحمل علشان خاطر عيون مصر وعيون السيسي الراجل الوطني المحترم اللي لولا هو والجيش كان زمنا ليبيا او سوريا او العراق.. عارفين احنا هنستحمل ليه.. علشان تعبنا من الشحاتة وكمان تعبنا من العاطلين والفاسدين اللي عاوزين يعملوا كل حاجة وهما قاعدين علي المقاهي ينصبوا علي بعض..اسمعي يا حكومة اوعي تفتكري ان احنا هنستحمل علشان خاطر عيونك..لا خالص..احنا هنستحمل علشان عندنا أمل ان البلد دي حالها يتغير بجد ونعرف نعيش علي فلوس البلد مش الشحاتة.. وكمان ولادنا تلاقي بلد مستقرة.. بس والنبي وأنتم بتيجوا علي الناس علشان تستحمل لازم تعرفوا ان الفساد اللي مالي البلد في كل حته لا هيخلي إصلاح ولا تعويم ولا غيره.. الحرامية والفاسدين كتروا اوي ومحتاجين قوانين تدي الناس حقها زي ما أنتم خدتم قرارات جامدة كدة وقدرتم تنفذوا خطة الإصلاح الاقتصادي..عاوزين قرارات بجد تعيد المستثمرين للسوق وعاوزين قانون للمرور ومش عاوزين الحكومة تسيب الناس لمهندسي الأحياء الفاسدين اللي بيعملوا قضايا وهمية للناس المحترمة علشان يحموا البلطجية ولا لسواقين الميكروباص اللي بيبلطجوا في الشوارع وتلاقي مخالفات المرور للناس اللي ماعندهاش عربيات اصلا..احنا مستعدين نستحمل اكتر من كدة بجد وناكل طقتين مش ثلاثة ونشرب الشاي من غير سكر بس كمان محتاجين نحس ان احنا في بلد فيها قانون يطبق علي الجميع.. اللي يتاجر بقوت الغلابة يتعدم.. واللي يبيع لحم الحمير علي انه لحم بقر يتعدم واللي يبيع مخدرات يتعدم.. والموظف المرتشي يتحبس ويتفضح.. واللي يسرق كهربا يدفع تمنها مش تتحمل علي الغلابة.. خلي بالك يا حكومة اللي كان مرتبه الف جنيه صحي من النوم اكتشف ان مرتبه 500 جنيه ومع ذلك هنستحمل بس انتي كمان لازم تشتغلي والوزير اللي مش قادر نقدم له جواب شكر وندور علي غيره.. حاسس ان البلد هتعدي الأزمة وهتبقي قد الدنيا بجد.. وحاسس ان ربنا هيكرم السيسي علشان راجل بيخاف ربنا بجد.. بس خايف ان الحكومة تكون مش فاهمة هي بتعمل ايه: ولا تكون مش حاسة بتعب الناس.. لو نجحت خطة الإصلاح ستعبر مصر أخطر أزمة تعرضت لها علي مر التاريخ ولو لا قدر الله فشلت ستتحمل حكومة المهندس شريف إسماعيل تحويل الطبقة المتوسطة في مصر إلي طبقة فقيرة ووقتها لن ينفع الندم ولا الاعتذار.. أتمني ان يصمد الشعب ويتحمل ظروف الدولة وعلينا ان ننظر جميعا إلي المستقبل برؤية اكثر تفاؤلا لاننا سنجني ثمن ما نتحمله اليوم.. وتحيا مصر.