إحم إحم

أهل السكر !

مكالمة من أمي في البلد:
- عامل إيه ياولدي؟
- أديني غرقان في الشغل!
- غرقان في الشغل أحسن ماتغرق في السيول ياولدي.
- ربنا يستر يامه ويصبر الناس..قوليلي أخبار أزمة السكر عندكم إيه عارفك بتحبي البسبوسة والكنافة يام هشام.
- بس يانصاب صحيح فكرتني فين البسبوسة إللي قلتلك عليها؟
- غالي والطلب رخيص يامه ليكي عليا أول ماوصل البلد أجيبلك إللي انتي عايزاه.
- ماتعملش زي الحكومة وماتصبرنيش بوعود وكلام معسول وعهود!
- ههههه حاضر ياست بس هي يعني الاقصر كلها مفيهاش معقوله يا أهل السكر بلادكم مافيهاش سكر؟
- منين ومحلات الحلويات قفلت وإللي بيتقفش عنده كيس بيروح في حديد !
- يامه بلاش تصدقي كل إللي بيتقال علي السوشيال ميديا!
- ياولدي مش لاقيه سكر اعملي كوباية شاي يبقي منين النفس اللي تفتح تويتر وفيس بوك اصلا؟
- هههههههه والنبي إنتي اللي سكر يامه،تصدقي أنا لو مسئول في البلد دي أحل بيكي أزمة السكر!
- إزاي يابكاش؟
- افتح مصنع كبيييييييير واخلي لسانك إللي بينقط سكر ده ينقط في فناطيس كبيرة وبعد كده في أكياس ونوزعه علي الناس!
- كلام كلام مابخدش منك غير كلام.
- صوتك احلي من الصبوحة يامه؟
- يابني بلاش تاخدني في دوكة زي زمايلك مابيعملوا معانا كل ليلة في التوك شو وعايزين يلبسونا كل التهم وبيدافعوا عن الحكومة!
- يامه صدقيني مشكلة البلد دي في الناس مش في الحكومة والحكام يعني الناس عارفة مخرات السيول وبتبني فيها !
- مخدات إيه اصحي بقي من النوم مفيش فايدة فيكم كل مشكلة تلبسوها للناس.
- تقصدي مين بكلمة فيكم يامه دي؟
- أصلي لولا عارف انك ابني ولد بطني كنت قلت إني باتكلم مع وائل الإبراشي ولا احمد موسي ولا رمزي مجاهد!
- قصدك عزمي مجاهد يامه.
- عزمك انت مش عازمني أنا أهو الراجل ده كل يوم يفضل يبحلقلنا ولو يلاقي عدل ينط من الشاشة يضربنا بالصرمة القديمة!
- طب سيبك منهم يامه وطمنيني رجليكي عاملة إيه دلوقتي؟
- رجليا بقت زي المحليات بالظبط !
- مش فاهم يامه تقصدي إيه يعني؟
- يعني رجليا دلوقتي مافيهاش ولا حتة مظبوطة والفساد ضربها من فوق لتحت والسيول غرقتها ولغاية دلوقتي الحكومة مابعتتش عربية تسحب الميه؟
- يامه الله لا يسيئك ركزي معايا حبتين علشان عندي شغل إيه دخل الفساد برجليكي ولا يكونش قصدك الروماتيزم؟
- وهو الفساد إيه غير روماتيزم ياصحفي يابتاع الكلام والحديت؟
- طب وإيه حكاية الميه إللي غرقتك دي؟
- يابني الميه المعششة في ركبي أكتر من الميه إللي نزلت علي راس غارب ولغاية دلوقتي ولا حتي عربية شفط جاتني !
- ههههههه الله يحظك يامه ضحكتيني وانا مليش نفس أضحك، بتشبهي الميه إللي في رجلك بمية السيول، بتكلميني بالتورية والبلاغة ياحاجة؟
- بمناسبة البلاعة صحيح هي الحكومة فاكرة ان الشتاء دخل ولازم يسلكوا بلاعات اسكندرية ولا حايستنوها لما تغرق؟
- لا اطمني يامه الحكومة قفشت العيال إللي كانت بتسد البلاعات والسنة دي مفيش غرق ان شاء الله.