كلما حلت علينا مناسبة مهمة أشعر معاها قد إإإيه باحب مصر.. وباموت أنا وغيرى فى ترابها.. بجد ومش فذلكة وحنجورية.. وشوفوا احتفالية إمبارح بتاعة مهرجان الإعلام العربى.. حاجه تفرح وشىء يشرف.. ومش لاقى غير متشكرين للى عملوا الحاجات الحلوة دى. حبيبتى ومعشوقتى الصديقة الجميلة «جوه.. وبره» سوسن بدر.. مش لاقى كلام أقوله أجمل من إللى انكتب فيكى عن جائزة أحسن ممثلة فى مهرجان القاهرة السينيمائى 2010.. لكن إنتى الممثلة إللى حسيت أنها تستاهل الجائزة من أول المهرجان ما إتعمل.. عشان إنتى قصة صبر وكفاح وعرق لسنين طويلة.. وربنا إدالك جايزته.. وفاضل ابن الحلال إللى يريح قلبك ويهدى سرك.. وده أحسن من مليون جايزه ومليار جنيه.. صح.. !! معقولة.. وليد دعبس بيلعب فى شوال ملايين - اللهم لا حسد - ومودرن مش بتدفع أجور شوية معلقين فاضحينها فى الجرانين.. يا نهار مدوحس.. يا ترى بيجيلك نوم يا وليد وعليك فلوس لحد..!! اعط الأجير حقه قبل أن يجف عرقه.. وانت محترم وحقانى.. !! خالد يوسف.. يا رب العروسة الجديدة إللى بيقولوا قمر وطعمه وحلوة زيك كده تقدر تنسيك الحاجات إللى الناس كلها عاوزه تغيرها فيك.. ودايماً بتقع واقف.. مبروك. سميرة أحمد.. يا بنت اللاعيبة.. السنة دى وديتى محمود ياسين القسم.. والسنة الجاية هاتودى حسن يوسف البرلمان.. امال لو اشتغلتى مع عادل إمام.. هاتوديه فين !! لو وفاء عامر معملتش تحية كاريوكا زى الناس.. وغادة عبدالرازق ماعرفتش تعمل سمارة.. يبقى تحية كاريوكا هاتدعى عليهم فى الآخرة.. ومش هايقدروا يوروها وشهم هناك.. !! على فكرة.. هواة الشكاوى الكيدية ليهم عندى حتة دين فيلم ضخم الإنتاج اسمه «جهنم وبئس المصير»!! [email protected]
