ولسه فلوكتك ع الرملة تنادي العدة المتخبية في بطن سريرك من سنتين وكأنك هتقوم الفجر وترمي شباكك جوه البحر النايم لسه في حضن الليل لساها بتحلم تركب موجه العالي زي ما كنت زمان بترسيها وبعد العصر ترقع غزلك المنصوب علي حيطة قديمة رسمت عليها زمان وأنا عيل وردة ومركب لسه بتحلم ترجع يوم وأنا يوم ورا يوم بفتكرك كل ما أروح البحر لوحدي وألمح مجدي في نفس مكانه آخر الحارة وضحكتك لما تناديه وشخطتك في البت سارة تنكسف .. تقوم عاطيها أوام جنيه لسه فلوكتك بره البحر بتحلم بيه لسه بتحلم يوم تلقاك ولا تعرفش إن انت هناك .. وخلاص مش جي والبحر كمان بقه موج نساي ولا عدش الغزل في قلبه يفيض ريس بالفطرة في علم الصيد بفلوكة ومدرة وخليوة حطيت البحر في غنيوة .. وفي قلبي النونو رميتها زمان لفيت وكبرت بقيت إنسان والغنوة في بالي مفارقتنيش لساني بحب البحر وطيشه وكل ما أروحله أقرالك الفاتحة ولسه فلوكتك ع الرمل بتستني الطرحة أحمد شلبي