احم احم .. انا قررت اكتب .. بس مكنش دا القرار الوحيد اللي قررته .. قررت اني اعتزل الكتابة بعد لما اخلص كتابة .. لاني مش كاتب ومش مؤهل للكتابة .. بس حبيت اخوض التجربة بناء علي نصيحة من شخص انا بعتبره مثلي الاعلي .. رغم انه في نفس عمري تقريبا او اكبر مني بسنة او سنتين .. بس انا بعتبره مثلي الاعلي . الحمد لله دلوقت انا كتبت تلات سطور .. بس مش عارف هكمل اكتب في ايه .. انا اخترت العنوان .. وقررت ان العنوان يكون ورقة سوده .. لاني لما دخلت علي مواضيع ورقة بيضاء اللي في الموقع .. ملئتش اي بياض .. لقيتها كلها سواد وانتقادات ومشاكل وزحمة .. فقولت لو كتبت ورقة سوده يمكن يكون الكلام اللي فيها ابيض .. وقررت كمان ان تحت العنوان مكتبش كلمة بقلم ايمن النهري .. واختارت اني اكتب بكي بورد ايمن النهري .. لاني بكتب علي الكي بورد مش بكتب بقلم .. وبالمناسبة انا خطي في الكتابة سييء جدا .. لدرجة ان خط الدكاترة بالنسبة لخطي يعتبر خط كوفي او خط فارسي .. وسوري لو خليتكم تطلعوا لاول الصفحة تاني علشان تشوفوا هي ب كي بورد ايمن النهري ولا بقلم .. انا في اللحظة دي والربع ساعة اللي قبلها خدت اكتر من قرار رغم اني من النادر لما باخد قرارات .. قررت اني اكتب وقررت اني اعتزل الكتابة وقررت العنوان هيكون ايه .. فاضل اهم حاجة وهي اني اقرر الموضوع نفسه هيكون عن ايه .. ودلوقت حالا انا قررت اني مش هنتقد المجتمع ولا هنتقد السياسة والنظام ولا هشتكي من الزحمة ولا هتكلم عن الحياة السلبية الطبيعية اللي عايشها مع ال 80 مليون .. انا واخد القرار ان الورقة تكون بيضاء علي عكس العنوان .. قررت اني اكتب في حاجة ايجابية في حياتنا .. او حتي ربع ايجابية .. حتي لو كانت حتة ايجابية اد السنتوفه .. مش هكتب عن واحدة ست كبيرة في السن عمرها عدي الستين ماشية في الشارع علي الرصيف دا لو عرفت تطلعه اصلا ومعاها كيس بلاستيك اسود الساعه 3 الضهر في عز الحر والصيف وانا قاعد في تكييف عربيتي بنفخ وبقول ايه القرف دا والزحمة دي عاوز اروّح بسرعة اخد شاور .. ولا هكتب عن بنت لسه في اول مشوار حياتها بتتمني انها تعيش حياة بسيطة وهادية مع انسان بسيط وهادي في بيت بسيط وهادي وتكون اسرة بسيطة وهادية .. وفي بنت زيها عايشة بمنتهي السفه ولا حاسة بأي حاجة في اي حاجة ومهما ربنا بعتلها من رزق ووسائل رفاهية مش عاجبها حالها ولا عاجبها حاجة .. ولا هكتب عن شباب زي الورد بيغرقوا في مراكب الهجرة غير الشرعية علي امل انهم يعرفوا يعيشوا .. مجرد انهم يعيشوا ويفتحوا بيت ويكونوا أسرة .. وفي زيهم شباب مرتباتهم تخليهم يعيشوا عيشة كريمة في شركات محترمة ورغم كدا طول الوقت يقولوا امتى ربنا يتوب علينا احنا زهئنا ولما يتطلب منهم شغل يقولوا لأ كدا علي اد فلوسهم .. ولا هكتب عن اب بيحرم نفسه من كل حاجة علشان يوفر مصاريف اسرته وبيته وكل كام سنة ينزل يشتري قميص وبنطلون بالتقسيط .. وفي زيه اب بيجري ورا رغباته ونزواته وبيستغل رزق ربنا اللي بعتهوله اسوأ استغلال .. ولا هكتب عن عربية اسعاف بتنقل واحد حالته خطيرة وواقفة في الشارع والشارع واقف علشان الناس نازلة تحتفل بفوز مصر ببطولة الامم الافريقية وقافلة الشارع .. ولا هكتب عن اسرة بتنام من غير عشا ورغم كدا بتقول الحمد لله وفي زيها اسرة تانية بترمي الاكل في الزبالة وتقول ايه القرف دا .. بس كدا الصفحة هتقلب علي اسود .. وانا لحد دلوقت مش شايف اي بياض في الورقة زي ما كنت مقرر .. بس ليه دايما احنا بننتقد حالنا ومش عاجبنا حالنا واحنا احسن من غيرنا بكتير .. ليه مش بنقول الحمد لله علي الرزق اللي ربنا بيبعتهولنا وميزنا بيه عن ناس كتير .. ليه مش بنحب بعض .. ليه مش بنشوف حالنا ونشوف حال غيرنا ونحمد ربنا ونساعد غيرنا .. وفي ادينا كتير نقدمه لغيرنا .. الهدف مش اننا نتبرع بفلوس لمستشفى ولا جامع ولا متسول في الشارع .. ولا نستنى رمضان علشان نعمل اي حاجة خير وخلاص .. في ناس كتير حالها بسيط جدا ومع ذلك بتقول الحمد لله علي نعمته .. قال تعالى : "للفقراء الذين أحصروا في سبيل الله لا يستطيعون ضرباً في الأرض يحسبهم الجاهل أغنياء من التعفف تعرفهم بسيماهم لا يسألون الناس إلحافاً وما تنفقوا من خير فإن الله به عليم" صدق الله العظيم انا خلاص كدا خلصت كتابة واتمني ان رسالتي تكون وصلت .. وبالآية الكريمة بعلن اعتزالي الكتابة .. وآسف لو كنت ازعجتكم .
