قالوا الهدايا كتير ... يابو العضل .. شيلها ... وإن مال عليك م الطير .. عصفورة أكلّها ! مين اللي قال ممنوع .. نتهادى لما نجوع .. هل يرفُض الجربوع .. حاجة النبي قبلها ؟! عجبي !
يا حاسدين الحُب .. الحُب قوس أعمى ... مين اللي بينشنُه ؟ المولى .. والنعمة والنعمة من ربنا.. دي هدايا من ربنا، واللي يهاديه ربنا ... هيرجّع النعمة ؟ !!!
النعمة مبترجعش .. علشان نبدلها، ولا ليها وقت عشان ربّك يأجلها ... بتيجي خبط ولزق.. الحب زي الرزق.. يا موزع الأرزاق .. إدينا وإديلها ...
حبيبتي ع المينا.. وديلها مرسالي، بلغها مني سلام، واوصف لها حالي ... سألوني نفسك في إيه.. رديت وقولت يا رب ... أنا نفسي أكون برّها .. خليها ترسالي..
أحلف يمين ويمين .. لو عتبت برّي ... لأعملها هي العسل، وأحلي بيه مُري ... و إن قالوا توبوا هتوب وأرجع أشيلها ذنوب، وأنا ذنبي ف المحبوب- علني على سري !
الحب ستر وغطا، والعمر سر كبير .. والدنيا أخد وعطا، وانتي اللي فوق البير ... وأنا عشقي جني وحلف.. إنه يعيش مختلف.. ما تموتوش "لام .. ألف" ، و لا يصرفوش تكبير .
يا حاسدين الحُب .. الحُب نظرة عين .. بتفرّق الحمامات، و تجمّع الوليفين ... نظرة تشُق حيطان.. نظرة تهد حصان.. نظرة كما إنسان.. عايش حياة بروحين !
الأولة ف قلبُه ، والتانية في عينه ... إن نظره ما حضنهاش .. تحضنها شرايينُه ... وتضمه جواها، ويضمها جواه.. و إن مرة قالت آه .. الآهة بتهينه ...
إزاي يخطي الوجع.. فيكي وأنا موجود، ولا كل عضامي الزمن، و لا كل عيوني الدود ... إزاي يخطي الوجع.. فيكي وأنا ضهرك.. عمري دفع مهرك.. يا مخلداني خلود .
زرعوا البطر في الناس .. طرح الرضا فيا ... قلب الحبيب ونّاس، وعيونه أغنيّة ... وكلامه ليل معسول، قلب الإمام.. مسطول.. عفريت جريء وخجول ، و حبيبته جنيّة .
والنية لو أفراح.. قط بسبع ترواح .. والحب ليلُه صباح .. عطشان ملاغية .
يا حاسدين الحُب .. بكرة هنتقابل ... في يوم حساب مافيهوش .. حابل على نابل ... يا رب يا رحمن يا رب يا .. يا رحيم أرزقنا .. باللي نحبهم ... و الحاسدين ؟ بجحيم .
