أتوقفت كثيرا أمام ما قاله الرئيس عبد الفتاح السيسي في احتفالية ليلة القدر أمام قدر كبير من أصحاب العمم الأزهرية.. توقفي كان بسبب تعجبه الشديد من محاولات الفكر الإرهابي تصوير ما يؤمنون به على أنه الإسلام الحق.. وما دونه باطل.. إسلامهم صحيح وما دونه يحاسب معتنقه بالقتل.. السيسي قال: يعني "الحق" سبحانه وتعالى استدعى البشر عشان يؤمنوا به اختيارا.. أما هؤلاء يرون أن لازم نؤمن بربنا على طريقتهم أو يقتلوه.. لأ وكمان ييجي ربنا يوم القيامة يعذبهم.. " معقول ربنا هيعذب البشر يوم القيامة عشان لم يؤمنوا بيه .. دي حاجة صعبة أوي" معقول ربنا هيجي يوم القيامة يعذب مخلوقه عشان ما بيصليش ولا عشان ما بيصومش ولا عشان ما بيقيمش الحدود.. معقول ربنا خلقنا عشان يعذبنا دنيا وآخرة.. طب لو هو عايز كده ما خلاش ليه كل الناس أخيار.. ما خلاش ليه كل الناس مسلمين أو مسيحيين أو يهود وكلهم ديانات سماوية أتت كلماتها وتعاليمها من عنده.. طيب احنا كمسلمين أي دين نتبع.. دين الدواعش ولا دين تنظيم القاعدة ولا دين الاخوان المسلمين ولا دين الأزهر.. أي دين نتمسك بتعاليمه.. دين البخاري ولا دين أبو حنيفة ولا دين ابن حنبل.. أي دين نهتدي بيه في حياتنا.. دين السنة ولا دين الشيعة ولا دين الصوفية ولا دين المعتزلة السيسي قال:" فيه شباب كتير ألحدو يعني مخرجوش من الإسلام.. بس أنا مش قلقان من الإلحاد.. مش عشان أنا مش غيور على الله.. بس عشان متأكد أن دي هوجة وهتعدي".. وضجت القاعة بالتصفيق.. طيب أيها المصفقون ماذا أنتم فاعلون.. ماذا ستفعل يا شيخ الأزهر الذي قال لك الرئيس نصا: سيسألني الله عن تصويب الخطاب الديني.. وسأقول إنى أبلغتكم".. امتى هتبدأ المؤتمرات والندوات والعبارات الرنانة وتوزع الشيوخ على الفضائيات عشان يعرفوا الناس بالدين.. طب عرفت أي دين يريده السيسي.. خدت منه كتالوج الدين الذي يريد للمصريين أن يتبعوه.. الحقيقة أن الدين الذي يريده السيسي هو أبعد ما يكون عن دين مكتوب في كتب أصحابها أنفسهم لا يعرفون قراءته. الدين اللي إحنا عايزينه هو دين العقل.. دين الاحساس من المخلوق أن ربه اللي خلقه مش عايز يعذبه دنيا وآخرة.. ربنا مش عايز عباده يتخانقوا هو الحجاب فرض ولا لأ.. ربنا مش عايز خناقات على الفضائيات هو البخاري ألف الأحاديث دي ولا رواها فعلا.. ربنا مش عايز دواعش يقتلونا باسمه وأنهم بينفذوا تعاليمه ويوصلوا للعالم كله ان ديننا ارهابي.. أي ارهاب يحصل على طول فتش عن المسلم.. ربنا مش عايز واحدة ست تقف قدام المحاكم سنين عشان تاخد حريتها من واحد رماها هي وعيالها.. يا اما تخلعه وتتنازل عن حقوقها يا اما تعيش كعب داير على المحاكم سنين عشان القاضي بيقول نحكم بشرع الله.. ربنا مش عايز عمم تخطب في الناس وتقولهم هو ده الدين يا اما تمشوا عليه يا اما لهيب النار.. وفي الاخر تسألوا ليه نسبة الالحاد بتزيد.. ربنا مش عايز خناقة عشان شيخ قال دعاء القنوط في ليلة القدر تقوم عليه الدنيا عشان هو كده بيدعي على الرئيس مع انه هو نفسه تراجع وقال مش قصدي السيسي انا قصدي الرؤساء العرب اللي ضد السيسي.. ربنا مش عايز اقحام للدين في السياسة.. مش عايز نتاجر باسم الدين عشان نوصل للكرسي.. ربنا مش عايز ان دينه يتلطخ بوصمة الارهاب والقتل والذبح.. ربنا بتاعنا مش إرهابي.. ها هتعرفوا تعملوا ده ولا نتقابل بعد 100 سنة نقول نفس الكلام.. ربنا يدينا ويديكم طولة العمر.. ربنا بتاعنا مش بتاعكم!!!