حمرا ... أيوه حمرا ... الدنيا كلها حمرا ... كل شئ أحمر في أحمر فاللون الاحمر مكتسح أرجاء مصر .. انهاردة كانت مصر كلها حمرا .. الورود ... الملابس ... الهدايا. أدركت مسرعا أن اليوم هو عيد الحب يوم القديس فالنتين والذى يحتفل به الحبيبه ويرتودون كل ما هو أحمر ويحرصون علي تبادل الورود الحمراء والهدايا ولكن الشىء الأغرب فى عيد الحب هذا هو الدبدوب . جميعنا نرى الدب فى حديقة الحيوان أو حتى فى برنامج عالم الحيوان . ورأينا كم هو حيوان ضخم وله صوت مخيف فكيف أصبح رمزا للحب . والجدير بالذكر أن أخواننا الحبيبه فى اليوم ده يفعلون كل مابوسعهم للتعبير عن الحب دون أى مراعاه لشعور أخوانهم " السينجل " ورغم انى انسان طيب وبحب السعاده للناس كلها ،لكنى فى اليوم ده بحس بحقد وغيره شديده علشان مبعملش زيهم . وأفتكر أنى دخلت محل من محلات الهدايا من باب الفضول لأتعرف على تلك الدميه الملقبه بالدبدوب ( أصل أنا محدش جابلى دبدوب هديه قبل كده) المره الوحيده اللى حبيت فيها كانت من طرف واحد يعنى مكنش فيها دباديب ولا ورود ، كان أخرى يوم عيد الحب أتخيل يا ترى هيجيلى دبدوب فى يوم من الأيام ولا مكتوب عليا أعيش من غير دباديب طول حياتى. علشان كده قررت أنى أروح أشترى دبدوب لنفسى يوم عيد الحب وايه المشكله.. أنا بحبنى وأتمنى أسعد نفسي عشان كده هجيبلى دبدوب ، هنا كانت المفاجأه لم أجد فى المحل غير شكل واحد من الدباديب ومعجبنيش وأكتشفت أنهم بيقولوا دبدوب على كل اللعب يعنى كلب ماشى كتكوت ماشى ميكى ماوس ماشى تويتى ماشى وتعبت مع البائع جدا .. أقوله حضرتك أنا عايز دبدوب يفرجنى على كلب وعليه قلب أحمر .. يا حاج عايز دبدوب يفرجنى على كرومبو لابس أحمر .. أبوس أيدك يا حاج أنا نفسى فى دبدوب عشان الحب قاللى أنا كده فهمت طلبك يا بشمهندز ( ايوه قالها بشمهندز مش بشمهندس ) وراح جابلى قطتين حاضنين بعض وبينهم قلب احمر، خرجت من المحل وأنا حزين بعدما فقدت حلم حصولى على دبدوب الحب . قولت أنا مش هروح وأنا زعلان لازم أجيبلى هديه أفرح نفسى بيها رحت داخل على محل ورد قولت أجيب ورد أنا كمان محدش جابلى ورد قبل كده ، و قابلت فى المحل أكثر البائعين كوميديه ، أول ما شافنى قاللى أتفضل يا برنس الليالى ، أنا مش عارف هو قاللى كده ليه يمكن عشان كنا بليل طب ليه برنس !! المهم أبتسمت وقولتله عايز بوكيه ورد على ذوقك كده يعبر عن الحب ، غمزلى وقاللى أنت هتقدمه لمين ؟؟ أستغربت جدا وقولتله تفرق معاك ؟؟ قال طبعا يا برنس يعنى لو لخطيبتك تفرق عن مراتك تفرق عن الموزه بتاعتك ، قولتله موزه ؟!! لا ياسيدى الورد ده لحد غالى عندى وبحبه جدا وطبعا خبيت عليه أنى هقدم الورد ده لنفسى أحسن يقول عليا مجنون بعد ماكان بيقولى برنس الليالى، مكونتش هخلص من لسانه ، المهم قال طلبك عندى يا بشمهندز ( قالها بشمهندز زى بائع الدباديب ) هنا تشائمت وقولت برنس الليالى كانت أحسن ، جمع بوكيه من الورود المختلفه ألوانها لم تكن متناسقه ولفها بغلاف احمر ووضع فيونكه حمراء أيضا ، سألته عن السعر قال 300 جنيه بس ، مقدرتش أمسك نفسى وقولتله حتى الاستغلال والجشع وصل للحب كمان أرحمونا بقى ، وتركت المحل من غير ما أشترى لقيت البائع اللذيذ بينادى: يا برنس يابرنس روح أشتريلها دبدوب أرخص ، أبتسمت إبتسامه حزينه وقولت بس هى تيجى ومفيش حاجه تغلى عليها. أنهاردة عيد الحب ومعايه اللي تستاهل كنوز الدنيا كلها بس بردة مجبتش ليها حاجة.. بس دعيت لها أن ربنا يحفظها ويبارك لي فيها علشان هى أغلي حاجه عندى .
