قدم لاعب نادي الزمالك عمر جابر، خلال مداخلة "كورة كل يوم" على فضائية "النهار للرياضة" مع الكابتن كريم شحاتة، العزاء لأهالي ضحايا أحداث استاد الدفاع الجوي. وروى "جابر" الأحداث التي مرَّ بها في استاد الدفاع الجوي، قائلًا: "كنا رايحين الاستاد وعارفين إن فيه جمهور جاي، وفي الطريق لاقينا الجمهور وقف قدام الأوتوبيس وقالولنا إن فيه ناس توفت من الجمهور وإن فيه اشتباكات". وتابع لاعب الزمالك قائلاً: "الجمهور قال لنا إن فيه وفيات عند الاستاد، وكانوا محاوطين الأوتوبيس، كنت واقف مع حازم إمام وقال لنا خلاص مش هنلعب عشان اللى حصل، الساعة 7 جت الشرطة وحدفت القنابل المسيلة للدموع، وشفنا الموت بعنينا والباب كان معلق فقعدنا نفتح باب الأوتوبيس عشان كان معلق، والغاز دخل جوة الأوتوبيس، فقعدنا نجري في الصحراء من كم الغاز". وأضاف: "إحنا كنا بنموت ومش حاسين بنفسنا"، وتابع: "قالوا لنا مفيش حد مات وناس من الجهاز قالوا لنا إن إحنا مش هنلعب وبعدين جالنا أخبار إن مفيش حد توفى، وأنا كنت واخد قرار إني مش هقدر ألعب صحيًا ونفسيًا من كثرة الغاز اللي استنشقته، فقلت لهم مش قادر وإيدي بتترعش وصوتي رايح، وروحت للدكتور وأخدت حقنة، مش قادر أقف على رجلي". واستكمل جابر قائلاً: "كنت واخد قرار من البداية إني مش هلعب المباراة، وعندما شجعني الجمهور فقلت لهم: بعد إذنكم عشان الزمالك ما تشتموش الزمالك"، وأضاف: "أنا الحمدلله محبوب ومش محتاج أعمل حاجة عشان أبقى بطل". وتابع قائلاً: "زوجتي حامل وكنت ممكن أقول ألعب لكن أنا معملتش حاجة"، معلنًا أنه يطالب بفسخ العقد مع الزمالك، قائلًا: "أنا مش هقدر ألعب تاني في نادي الزمالك تاني أنا لازم أبعد عنها مش قادر، عشان حاجات كتيرة جدًا.. أنا مبحبش المشاكل". وتابع لاعب الزمالك في القول: "لو رجالة يشوفوا اللي حصل لي امبارح لكن هما برة مصر وقاعدين على تويتر وفيس بوك، وبيكتبوا عني من غير ما يعيشوا الموقف، وبقولهم ماتتكلموش". أما عن لاعبي الزمالك قال جابر: "أحترمهم جميعًا، وكلهم رجالة، ولو كانوا يعرفوا إن حد مات كانوا وقفوا اللعب".