مين هو نمبر وان..كان هذا هو السؤال الذي وجهه الإعلامي أحمد سالم لضيوف برنامجه «لحظات جرئية» المذاع عبر فضائية «القاهرة والناس» ورد عليه ضيوفه وهذه التعليقات والردود نرصدها لكم كما يلي: مراد مكرم: مفيش حاجة اسمها نمبر وان ومحمد رمضان مش نمبر وان أكد الفنان مراد مكرم أنه لا يوجد شيئ اسمه «نمبر وان» وأن الفنان محمد رمضان لا يعتبر رقم واحد «مفيش حاجة اسمها نمبر وان ومحمد رمضان مش نمبر وان في الدخل»، متسائلًا «نمبر وان في إيه». وأضاف «انا دايما بالنسبة لي الممثلين فاكهة وكل واحد بياكل الفاكهة اللي بيحبها وكل واحد بيتابع الفنان اللي بيحبه، وفيه الأسلوب الأمريكي اللي مبني على الأسلوب اليهودي في الماركتنيج أنا أعمل زخم حواليا». منى عبدالغني: كل واحد يقول اللي هو عايزه أكدت الفنانة والإعلامية منى عبدالغني، أنه لا يصح وصف أحد بأنه «نمبر وان»، مضيفة «مينفعش حتى اللي هما بنحطهم في مكانة معينة في قمة الهرم كفنانين سواء ممثل أو مطرب مبيقولش أنا نمبر وان، وأنا بشوف أن فيه قمم عندنا ومحدش يقدر ينكر إن كان فيه عبدالوهاب وأم كلثوم والسنباطي وكان فيه قمة وتنافس والتنافس ده اللي بيخلق حالة من الإبداع». وتابعت: «كل واحد يقول اللي هو عايزه»، وأثنت على الفنان محمد رمضان، قائلة: «انا بحب محمد رمضان الحقيقة واشتغلت معاه في زلزال هو محترم ومتواضع جدا وبيحب كل الناس ومبيكسفش حد وأنا بشوف الناس بتقبل عليه إزاي في أي مكان، هو فيه وهو مش بيدعي التواضع وهو متواضع لأنه من الناس حتى لو كنت باخد عليه حاجات أنا قولتهاله وإحنا بنعمل زلزال». سماح أنور: مفيش حاجة اسمها أحسن خالص ورأت الفنانة سماح أنور أنه لا يوجد ما يسمى أفضل فنان على الإطلاق، «مفيش في الفن حاجة اسمها أحسن خالص وفيه نمبر وان وفيه التاني والتالت لان دي أرقام لكن في الفن كله قمر، مفيش حد مش قمر خالص»، مضيفة «كل واحد نجم النجم ده منتج بيتحط في حاجة يجيب فلوس وده شغل إنتاج وشو بيزنس». صلاح عبدالله: عادل إمام هو نمبر وان اعتبر الفنان صلاح عبدالله، أن الفنان عادل إمام هو «نمبر وان»، مضيفًا: «عادل إمام هو نمبر وان ومفيهاش هزار» متسائلًا بسخرية «هنهزر إحنا»، متابعًا: «دي حقيقة منقدرش نتكلم فيها شاء من شاء وأبى من أبى حتى لو أنا مختلف مع عادل إمام». وكشف عبدالله عن سبب اعتباره الزعيم «نمبر وان»: «الواقع هقولهولك كده ده الوحيد اللي قدر يجمع بين نجومية السينما والمسرح والدراما التلفزيونية ومفيش حد قدر يحقق إنه يبقى نجم النجوم في السينما ولما بيعمل مسرح أعلى ايرادات وأعلى تذاكر والكام مسلسل اللي عملهم برضه نفس الحكاية»، مشددًا «ده ميقللش من قيمة حد على فكرة». ليلى عز العرب: زعلانة من محمد رمضان أكدت الفنانة ليلى عز العرب أن الفنان محمد رمضان لا يعتبر «نمبر وان»، مضيفة «لا مع احترامي له وأنا بحب محمد رمضان جدا بس أنا زعلانة منه لأن محمد ممثل كويس قوي وعنده إمكانيات هايلة بس معرفش مين اللي بيخليه يعمل الحاجات دي». سلوى عثمان: مشوفتش من محمد رمضان حاجة وحشة أما الفنانة سلوى عثمان، فقالت «أنا مقدرش أقول على محمد رمضان حاجة لأن أنا مشفتش منه حاجة وحشة وقناعاته الشخصية ومواجهة للجمهور بكلمة نمبر وان وهو حر فيها، وهو اللي بيتلقى حلوها أو مرها». وأضافت: «أنا هتكلم عن محمد رمضان كزميل في اللوكيشن شخص كان بيجتهد جدا في شغله، وكان بيحب زملائه جدا وكان ممكن يعمل مشهد ويسأل ولو عنده غرور مش هيسأل عمل المشهد حلو ولا لأ». دنيا عبدالعزيز: رمضان أكتر الناس موهبة «بس مفيش حاجة اسمها نمبر وان» واعتبرت الفنانة دينا عبدالعزيز أن الفنان محمد رمضان «هو أكتر الناس موهبة في مصر مش أعلى وفيه ناس كتيرة موهوبة وهو موهوب بشكل كبير، وأنا اشتغلت مع رمضان على المسرح والمسرح ده أصعب الفنون وأنا مش قدام كاميرا، ممكن أعمل ستوب وأعيد ويمكن المسرح غير لي شوية فكري أن بقيت بشوفه مختلف أكتر»، مضيفة أنه يتمتع بموهبة كبيرة «بس مفيش حاجة اسمها نمبر وان». مفيد فوزي: زمن التريند كده.. واحد يقول على نفسه «نمبر وان» واعتبر الكاتب الصحفي والإعلامي مفيد فوزي، أن الفنان محمد رمضان يطلق على نفسه «نمبر وان»، مضيفًا «زمن التريند كده إن واحد يقول على نفسه أنه نمبر وان». وتابع: «أنا روحت فيلم له اسمه جواب اعتقال واستناني في السينما اللي في مصر الجديدة وأخدني بأيدي وطلعني فوق عشان أقعد جنب علية القوم وعلية القوم دول كانوا جمال السادات، وسلمت عليه والسيدة جيهان السادات وسلمت عليها باحترام شديد جدا» متسائلًا: «قدر يوصل للناس دول إزاي معرفش». وقارن مفيد فوزي بين العندليب الأسمر عبدالحليم حافظ ومحمد رمضان، «عبدالحليم حافظ كان مرغوبا وكان الناس تتهافت عليه والدولة وكل البشر وكان مطرب الثورة»، وذكر أن أحد أصدقائه من تجار السيارات الفارهة أخبره أن رمضان اشترى منه 3 سيارات فارهة ودفع ثمنها باليورو، مؤكدًا أنه اندهش جدًا بسبب ذلك. وأوضح أن محمد رمضان له جمهوره «كل جمهور الترسو وهو ورث جمهور فريد شوقي بس فريد شوقي كان فنان ومحمد رمضان بيعتمد على فكرة الإبهار للناس بعربياته وبتصريحاته». ووجه مفيد فوزي نصيحة لمحمد رمضان «ينبغي أن يعتقل لسانه ويسكت والناس هتحبه أكتر، وميعملش حاجات كده وميجبش عربيات ويركبها».
