عبرت ناهد جمال سعيد، سائقة التروسيكل، عن سعادتها الغامرة باستجابة الرئيس عبدالفتاح السيسي، لمطالبها في توفير حياة كريمة لها ولبناتها الخمس، قائلة وهي تبكي: «ده أسعد يوم في حياتي النهاردة، عشان خاطر عيالي وجوزي ربنا بيحبني، دي أحلى هدية». وأضافت «ناهد»، خلال لقاء ببرنامج «من مصر»، المذاع على شاشة قناة «cbc»، الإعلامي عمرو خليل والإعلامية ريهام إبراهيم، «أنا بدفع 500 جنيه إيجار في شقة لو شوفتيها متدفعيش فيها حاجة، ومصاريف مدرسة لازم أقوم بيها». وتابعت: «ربنا عالم بحالي، أنا شقيت واتظلمت كتير، بس النهاردة أسعد يوم في حياتي، أنا اتولدت النهاردة، وعيالي عاشوا النهاردة، أنا عندي 5 بنات، رضا وهويدا ومريم وشيماء ورؤى، بناتي حلمهم بسيط يبقى عندهم بيت محدش يخبط عليهم». وواصلت: «بشيل على التروسيكل قطن مراتب، باخده من عند المنجد، وأشيل المراتب بعد ما ينجدوها وأوديها بيت العرائس، وساعات بتجيلي نقلات عفش، ساعات بشيل معاهم عشان أزود الأجر، ولو اشتغلت في نقلة أو نقلتين أجري 100 جنيه، والكلام ده على فترات، مش كل يوم». وكانت «الوطن»، أول من نشرت قصة السيدة «ناهد» في سبتمبر الماضي، بعنوان «ناهد حمالة قسية.. ضهرها يشيل رمل وطوب وعفش وأب وأم ل5 بنات»، والتي تلقت استجابة من مجلس الوزراء بعد ساعات قليلة من عرض المادة المكتوبة والمصورة بالفيديو.