كلام الناس دايمًا شاغل تفكيرنا (همّا قالوا إيه؟)، أكتر حاجة ممكن تقلل من شخصيتك التفكير طول الوقت في كلام الناس، الناس مش وراها غير الكلام. كلام عن البنت اللي ماشيه (إيه ده هيّ لسه ماتجوزتش؟! شكلها هتفضل قاعدة كده)، كلام عن الشاب اللي بيجري يلحق "الأتوبيس"، كلام عن الواد الفاشل اللي مبيذاكرش.. كلام عبارة عن "مطبات" عشان توقعك.. بتهدم آمالك وطموحك، بس إنتَ ليه تسمح لعقلك إنه يفكر للحظة في كلامهم!. كلام الناس يا صديقي لا بيقدم ولا يأخر هو انت عارف؟ الناس بتبذل أقصى ما تملك من خبرات وتفكير عميق عشان تكسر حلمك وتخليك تحس بالإحباط والفشل.. الناس دواير بتلف في دايرة واحدة عشان مش قادرين يتفقوا على حاجة معينة، فبيفضلوا تايهين في دايرة الحياة، ومع كل متاهة بيفكروا ازاي يوقعوك فيها والله إنتَ مش وحش، ولا فاشل زي ما بيقولوا.. هما بس بيحاولوا يقتلوك (هتسيبهم يقتلوك؟). مِش قصدي القتل اللي إنتَ فكرت فيه.. أنا قصدي "قتل الروح".. بيحاولوا يغيّروا قلبك الطيب ل قلب جواه سِنة شر، وكل يوم بتكبر لحد ماتوصل ل قوة مليانة غِل وحقد وكره.. إنتَ مش هتقدر تغيّر الكون في يوم وليلة.. ليه متبدأش من أول السطر؟، بس أرجوك بلاش وانتَ بتكتب أول كلمة تقول (الناس هتقول عني كذا لو عملت كذا) سيبك من الناس.. سيبك من كل حاجة، فكر في نفسك دلوقتي.. إنتَ عايز إيه؟ عندك حلم؟ متتخلاش عنه، مهما كان صعب وبعيد قريب أوي هتوصلُّه. انتَ محتاج شوية "قوة داخلية" تكسر حاجز كلام الناس، والتفكير دايمًا في الماضي (خد من الماضي اللي يقدر يقويك في المستقبل)، متبطلش تحلم؛ لإن ببساطة الأحلام حياة، وتحقيق الأحلام مش صعب فقط يحتاج منك إرادة وقوة وصبر حلمك مش بعيد، الله دايمًا قريب منك وسامع صوت قلبك وهوّ بيقول "يا رب".. الله الكريم، مهما كان حلمك بعيد بدعوة من "القلب" الله قادر يقربهولك، ثق في الله ثم في نفسك ومتقلقش.