«لو ما شلتش الصور دى هقطعهالك»، كانت الكلمة الأخيرة التى سمعها شباب حملة المرشح الرئاسى حمدين صباحى، أثناء نشرهم بوسترات دعائية للمرشح فى ميدان لبنان، الاعتراض جاءهم من موظف برئاسة حى العجوزة، قبل أن ينطلق على دراجته البخارية وهو يشير بعلامة النصر قائلاً: «سيسى سيسى سيسى».. الأمر لم يشغل بالهم فى البداية، فقد اعتادوا المضايقات والملاحقات من المارة وأنصار المشير عبدالفتاح السيسى «هى يعنى جت على بتوع الحى». فوجئ شباب الحملة بأن مجهود ساعات العمل ضاع هباء، بعد أن نفذ الموظف تهديده الذى وجهه لأيمن جميل، مسئول حملة «صباحى» بالدقى والعجوزة «قالنا ده مخالف للوائح والقوانين، ولما واجهناه بأن باب الدعاية الانتخابية اتفتح وأنصار السيسى معلقين صوره فى أماكن كتير، معرفش يتكلم وقالنا اسمعوا الكلام أحسن، وإلا كل الصور دى هتتقطع.. لكن إحنا مكملين». «جميل» يؤكد أن الصمود هو الحل من وجهة نظر شباب حملة «صباحى» الانتخابية، وأن سلوك موظفى حى العجوزة لن يهزهم «المؤسسات كلها مع السيسى، وده بالنسبة لينا مش مشكلة، الاعتراض إنهم مابيسيبوش فرصة للمرشحين التانيين يثبتوا نفسهم ويشتغلوا فى أمان لكن إحنا بنقولهم قطعوا وإحنا هنلزق تانى».