استنكر الإعلامي عمرو أديب، انتشار الشائعات بشكل كبير على مواقع التواصل الاجتماعي، فيما يخص مزاعم انتشار فيروس كورونا بمصر. وقال أديب، خلال حلقة اليوم من برنامج "الحكاية"، عبر شاشة "mbc مصر": "إحنا هنحارب كورونا ولا هنحارب الشائعات، الناس في العالم كله عندهم مصايب إلا إحنا، همنا إننا نتريق ونهزر ونطلع إشاعات". وكشف أديب، تغريدة مزيفة ومنقولة، كان نصها: "ابن أختي بقاله يومين بيعطس وعنده رشح وبيسخن، أختي كشفت عليه عند الدكتور وطلب منها تحاليل معينة، وقالها إن كل التحاليل بتقول إنه مصاب بفيروس جديد أعراضه زي الإنفلونزا اللي هو كورونا، وطلب منها تروح بالولد مستشفى حكومي تبع الوزارة، وكلنا مرعوبين وربنا يستر". وأشار أديب، إلى أن كاتب التغريدة مدون يدعى وائل المصري، حيث استعرض نفس التغريدة لكن هذه المرة كتبتها مدونة تُدعى "دينا"، وعلق بالسخرية: "بالصدفة دينا كتبت نفس الكلام". وتكرر ما كتبه وائل ودينا، مع أحد مستخدمي موقع التواصل الاجتماعي "فيس بوك"، ويدعى محمود الشهاوي: "صدفة غريبة، وكلهم زي بعض ومع بعض حتى في الأخطاء الإملائية وعلامات التنصيص". كما كتبت مدونة تُدعى منال، نفس ما جاء في التغريدتين والمنشور، ليعلق أديب ساخرًا: "بالصدفة برضه ابن أختها، ودول عينة، فيه عشروميت ابن أختي بنفس الطريقة ونفس الحكاية". وأعرب أديب عن غضبه قائلًا: "إيه الزبالة دي؟ إيه اللي انتو بتعملوه في العالم ده؟ أشك إن فيه ناس في العالم كده!، ده ملهوش علاقة بالهزار، ده حد بيضرب، لأن الغرض يتقال إن دي دولة عندها مصابين كتير ومش بتقول ويبقى في حالة هلع وقلة ثقة".
