قال الرئيس عبدالفتاح السيسي "لما كنا بنتكلم عن بلدنا، كنت ببص للموضوع بنظرة كلية، يعني معايا كام والبلد دي موازنتها كام، والبلد دي تقدر تصرف إزاي؟ ويا ترى النمو الاقتصادي كان متوافق مع النمو السكاني؟ دولة فيها 100 مليون يا ترى الفلوس الموجودة معانا كام؟ وعلى قد اللي معانا هنعمل للناس؟". وأضاف السيسي، خلال حديثه في المؤتمر الأول لمبادرة حياة كريمة، ضمن فعاليات اليوم الثاني من مؤتمر الشباب السابع، المنعقد في العاصمة الإدارية الجديدة، "هنفضل نشتغل ونشتغل لإن دولة زي مصر عاوزة على الأقل موازنة تريليون دولار.. لكن إحنا موازنتنا صعبة وأقل من المطلوب وبتتراكم المشاكل". وتابع: "من فضلكم توقفوا قدم كلامي علشان نعرف إحنا ليه كدا.. أنت عاوز 18 تريليون جنيه بشكل مستمر ومستقر لموازنة الدولة علشان تحل كل المسائل اللي تم طرحها، وده ممكن بس هناخد وقت وجهد، وكان من ضمن ده خطة الإصلاح الاقتصادي". وأكد السيسي: "اللي بيقولوا أنت قاعد تعمل المدن الجديدة العلمين والمنصورة.. ده تطوير استراتيجي للعقار في مصر علشان أجيب منه فلوس، مش علشان أصرف عليه، وما خدناش من الدولة فلوس للمواضيع دي، إحنا بناخدها للتشغيل". وبدأ المؤتمر السابع للشباب بجلسة افتتاحية، في الخامسة مساء، شهد خلالها الرئيس عبدالفتاح السيسي، فيلما تسجيليا، لأهم ما جرى إنجازه في العاصمة الإدارية الجديدة، والمصحوبة بحديث له خلال مؤتمرات وكلمات سابقة، كان أبرزها: "لو بتحبوا ربنا بجد، خلوا بالكم من بلدكم". وأعقبت الجلسة الافتتاحية، استراحة قصيرة، تلاها بدء فعاليات نموذج محاكاة الدولة المصرية، وشهد مناقشات حول "التحول الرقمي، والتسويق الحكومي"، بخلاف المشروعات القومية وانعكاسها على الاقتصاد وحياة المواطن بصفة عامة. وحضر المؤتمر، الذي تنتهي فعالياته، اليوم الأربعاء، عدد كبير من الشخصيات العامة ورجال الدولة والإعلاميين ورجال أعمال وسفراء لدول الاتحاد الأفريقي؛ لمناقشة عدد من القضايا الوطنية والتي تشمل عدة محاور تخص الإصلاح الاقتصادي، والموازنة العامة للدولة 2019 - 2020، وإصلاحات إدارية هادفة؛ لتحسن مؤشرات الاقتصاد الكلي.
