أنا خلاص هاتجنن من الراجل ده، جنني وطلع الجنونة خلاص أعمله إيه يا ناس، ومش قادرة أتكلم وأفضفض لأني لما بتكلم، ستين لسان بيطلعولي ويقولولي انتي بتتبتري على النعمة، حد لاقي يتجوز، والا في حد بيتجوز، مش هو ده محمد اللي كنتي هاتموتي وتتجوزيه، وطول أيام الخطوبة محمد عمل، محمد سوى، هو إيه اللي جرى يا ناس يا عالم أنا خلاص هطق، حاسة بملل فظيع، ومش عارفه أعمل إيه في البيه اللي متجوزاه. أينعم هو طيب وحنين وبيحبني وفي صفات كتير حلوة بس في حاجة هي اللي مجناني تقدروا تقولوا علية كائن بيتوتي جدا من البيت للشغل ومن الشغل للبيت ما بيحبش يخرج خالص أقوله أنا عايزة اخرج أتفسح يقول لي ليه، أقوله أغيّر وشوش أشوف ناس ماشية نزور قرايبنا، المهم نخرج من البيت، يقول لي هو لازم نخرج علشان نشوف الناس تعالي نقف في البلكونة وهانشوف الناس ماشية في الشارع، طب ما نعمل زيهم، يرد ويقول ما أنا كنت في الشغل وزهقان من الناس، يا حبيبي أنا مش زهقانة أنا طول النهار بعد في حيطان الشقة وإحنا لا عندنا عيل والا تيل علشان أتلهي فيه بلاش نخرج نتفسح تعال نزور قرايبنا تعالى نزور مامتك وباباك بلاش ماما وبابا علشان ماتتحججش يعني كل الفيلم ده علشان تشوفي بابا وماما هخليكي تشوفيهم وتشوفي مامتك وبابكي كمان هو أنا عندي أغلى منك دخلت لبست تايير شيك علشان الخروجة ألاقيه لسه ما غيرش هدومه، يا حبيبي يالا علشان نخرج، يرد عليا بكل برود ومين قالك إننا هنخرج، أومال أنا دخلت ألبس ليه، قال لي براحتك، براحتي إيه انت مش قلت إننا هنزور ماما وبابا ومامتك وباباك، أنا مقلتلكيش هنزور أنا قلت هتشوفي، يالهوووي اوعى تكون ناوي تطلع لي صورهم وتقولي شوفيهم، ألاقي بيقولي لا يا حياتي أنا أقدر أحس إن في حاجة ناقصاكي وانت معايا والا يكون نفسك في حاجة معملهاش أنا طلبتهم وعزمتهم على العشا معانا النهاردة جيت على نفسي وقلت مش مشكلة كفاية الكلمتين الحلوين دول أهو هاشوفهم وخلاص وبلاها الخروجة. قلت أفكره بأيام الخطوبة يوم ما خرجنا على الكورنيش وأكلنا ذرة وترمس ويا ريتني ما فكرته أنا اللي جبته لنفسي تاني يوم لقيته داخل عليا بسميط وبيض وجبنة وترمس وذرة وخد الشواية وقعد يشوي الذرة في البلكونة، قال إيه، علشان تكون الذرة سخنة، كان ناقص يجبلي الكورنيش بالمرة، أقول له أنا مش عايزة كل الحاجات دي أنا عايزة أخرج، يقول لي هو في حاجة ناقصة، نسيت الحاجة الساقعة هطلب السوبر ماركت حالاً يبعتولنا حاجة ساقعة، مرارتي تتفقع والضغط يعلى عليا وأنا لسه في عز شبابي وخايفة يجبلي جلطة من عمايله أسكت وأعديها. لكن كله كوم واللي عمله دة كوم بقالي كام يوم عمالة أزن عليه نخرج ناكل بره إن شا الله فول وطعمية بس أخرج بجد زهقت لقيته الصبح وهو رايح الشغل قالي متعمليش غدا النهاردة هناكل بره هيهههه أخيرا هخرج ويتفك حبسي، من الساعة واحدة الظهر وأنا بلبس وأجهز في نفسي ألاقيه جاي وجايبلي الأكل معاه، احنا مش هنخرج ناكل برة، لا يا حبيتي هناكل بره في البلكونة، أصوّت والا أعمل إيه أنا مش عايزة أكل برة أنا عايزة أخرج من الأربع جدران دول أنا ما بحبش الأكل بتاع المطاعم أصلا، بس أعمل إيه أي حاجة تخرجني، أنط مثلا من البلكونة وأخلص، والا أزقه وأخلص منه ومن عمايله والا أعمل إيه؟. ألو السوبر ماركت.. لو سمحت عايزة أكياس بلاستيك وساطور حامي!
