حلم عمري هو كل همي في عز نومي.. وفي وقت سهري من زمان بدعي.. أقول يا ربي حقق لي حلمي الحلم اللي كتير زي اتحرم منه كنت صغير ولسه باخد مصروفي شايف نفسي ومعترف بظروفي كنت حاسس بآلامي حتى في كفوفي كل يوم يزيد الألم أصبر.. وأقول بكرة يا عيني تشوفي أنا من حقي أحلم ولا الحلم محتاج له واحد سليم .. واحد جديد نوفي أنا بحلم أكون حرف من حروفك يا وطن بحلم أكون واحد من جيشك يا بلدي أنا بحلم أكون طالب في كلية ولا معهد أتخرج وأكون أول ضابط لبلدي معوق أنا بحلم ومش عارف إيه مصيري أنا ماشي على قدي وبقول لأقدامي علي راحتك سيري قلبي بيحزن لما بشوف اللي لابس ميري وأقول يا روحي عليه روحي وطيري حلم كبير وأصبح القيني بتوجع على سريري الأمل راح مني غصب عني.. وجع كبير في قلبي.. اسمه حلم عمري وأخيرًا نادو اسمي.. روح يا ابني إنت رفض طبي يا باشا ده حلم عمري يا ابنى إحلم براحتك يا باشا مصر في قلبي مصر بتقولك إنت ما ينفعش تكون مسؤول على أمني والله كان نفسي أشوف صورتي وأنا لابس كاكي وأنا لابس زيتي وأبقى معاكم وتوحشني أمي ويوحشني بيتي.. عايز أشوف نفسي بالبيادة وأعرف يعني إيه عزيمة.. يعني إيه إرادة؟ يعني إيه سفين ونسر.. يعني إيه جنود وصف؟ أنا مصري وأتركن على الرف رفض طبي مكتوبة بالحرف كلامكم قانون ولا فيه ود ولا عُرف نفسي أرفع العلم ساعتها هانسى الألم عايز أشوف اللي حرروا البلد نفسي أعيش معاهم وأحلف بروحهم وبدماهم بحلم أكون دفاع جوي.. لأي طلق مدوي أكون واحد من السباع.. وأعمل وأسوي وأكون وطني.. وأظهر كل اللي عندي وعمري ما أكون سلبي أكون واحد من المشاه والله مصر في حفظ ربي يا ابني بقولها تاني.. إنت رفض طبي اللي زيك ما ينفعش عندي.. ما تنفعش تبقى جندي فين سمعك؟ فين نظرك؟.. هات إيدك دا المعصم دا المفصل تجنيدك يا ابني.. مش هيحصل يا خسارة! لهدفي.. مش ها أقدر أوصل إنت يا ابني كبيرك يوم وتفصل طيب يا باشا.. ها أعمل إيه في حلم عمري؟ خلوني معاكم تعلموني السلام.. تعلموني التحية تعرفوني يعني إيه مدفع؟ يعني إيه مدفعية؟ حتى لو هاموت.. أهي موته تشفع ولو شايفين إني مريض عندكم كام طبيب يتمنى يعالج قولولي مين هايمنع بكره ابني يسألني وعيني تدمع من حقي أتكلم.. وابني يسمع.. من حقي أكون بطل وأحاول أمنع العدو اللي عايز مصر تولع عرفوني يعنى إيه ردار.. يعني إيه عيون سهرانة لليل نهار يعني إيه مكافحة الأشرار عايز أشوف رملة سينا أشوف الأسود اللي بتحمينا أكون واحد من أمن القناة والمينا نفسي أزورك يا سينا وأسمعك بتنادي إنت واحد من رجالي بس أعمل إيه في الرفض اللي جالي كنت متعشم يا باشا تقولي شيل مخله من المخالي ليه مستضعفين حالي يا ابني الوطن غالي ولازم البطل يبقى أسد من الأسود خلوني معاكم حتى ولو أعد الجنود حتى لو أكتب أسماء الشهداء اللي على الحدود أنضف السلاح.. أقول صفا وانتباه.. أحس مره بالحياه خلوني جنب الدبابات واعتبروني حالة من الحالات هو ينفع أقول لأولادي حرمتني القوات كان نفسي أحكيلهم عن منظر الضباط عن قائد اسمه المشير عن بطل اسمه الفريق كنت بحلم أسبح في بحركم حتى ولو أموت غريق حلمت أكون صقر في جيش بلدي ولا نسر أطير في السما وأشوف حدود أرضي حتى لو عصفور صغير أغرد معاهم السلام الوطني يا ابني إنت مُصر على أحلامك.. وأحلامك عليك مُضرة صح يا باشا الحقيقة الأحلام عليا مُضرة وإعاقتي إعاقة حُرة وبكره بالنسبه لي صعب والحقيقه مُرة يا ابني كفاية حزن.. كفاية آهات يا باشا عيوني مليانة دموع.. وألمي بيزيد بين الضلوع لما أشوف الأسود في السما نازلين بالمظلات أقول ياريتني معاهم ولاد الزوات اللي ما يعرفوا خوف قلوبكم نسيت الدقات يا ابني قلبك ضعيف وجسمك مريض إنت في حاجة لصحة وثبات يا باشا ياما غزوات وفتوحات وكانوا الضعفا فيها بينكتب فيهم أبيات يا ابني عصور وفاتت وياما دموع على الخد سالت يا باشا شوف جيوش ابن الوليد اللي ياما بالحق نادت وعمرها عن الحق ما بعدت ولا مالت كل وقت يا ابنى وله آذان بس الجيوش أبطالها حية ومازالت حتى ولو نسيت الشعوب أو اعترفت وقالت الدفاع عن أرض البلد له أسود.. هي طالبتهم ونادت أنتم أسودي احموني واحمو حدودي أنا بردوة أسد وكلي عزيمة وعمري ماكون أبدًا سبب هزيمة أنا معاق بس روحي سلمية ووجودي معاكوا شرف وقيمة إنت يا ابني أسد بس ليه بتعترض والله مش بعترض على القدر أنا بعترض على قرار وصدر قرار حرمني إني أشوف شمس الصيف حرمني من الشتا وصوت البرق البرق اللي هايعرفني إيه الفرق ما بين البطل وما بين واحد من الشعب وبين خاين يستاهل الحرق وما بين حناجر بتتهتف باسم البلد وحناجر تستاهل الشنق أحلم يا شاعر وفي آخر حلمك يتضح إنك واحد من الشعب حلم كبيير وتحقيقه صعب لما أسمع واحد بيحكي عن خدمته الوطنية عن حكاية عن مأمورية أحزن وأقول كان نفسي افتخر وأحكي لأولادي.. أحكي لأحفادي دلوقتي أقول إيه؟ أقول أنا مصري.. أنا مصري ومصر بلادي.. مصر بكرة.. ومصر الماضي أنا كبيري حافظ سلامك بلادي بلادي بلادي لكي حبي وفؤادي يا رب اللي أنا اتحرمت منه ما يتحرمش منه ولادي وسلام ليكِ يا أغلى بلد إن شاء الله هاكون بطل حتى لو مش في جيشك يا بلد ولو أراد ربنا للولد هايعيش بطل ويموت بطل و.. في غيره مليون ولد يموتوا فداك يا بلد كلنا ولادك يا مصر وابنك صقر ونسر وأسد ابنك صقر ونسر وأسد