عشان فاهم أنا المجنون ف عين الناس لكني فخور.. ومش قابل أعيش عاقل.. وقولوا زي متقولوا قولوا جاهل ومش فاهم برءوا نفسيكوا م العصيان اخلقوا من فهمي شماعة عليها علقوا غلطكوا واعربوني أنا فاعل.. وكل حاجة مطلوبة ردي هيبقى مش عامل.. اكمن مرارة الواقع خلتني معرفش أجامل.. أنا العامل الطيب.. اللي مشفش خير بلده وأنا الراجل الشرقي وبرده هبقى أنا ولده.. وأنا الجندي اللي ف الصحرا في إيده سلاحه بيحارب وأنا شهاتك على الحيطة يادوب آخرها تتبروز وأنا الجهل اللي ف سكوتنا وأنا الشخص اللي عشت مريض بكدبة بكرة تتعدل أنا اللي عشت متكمم خدام معاليكوا يا اسيادنا.. أنا شبت ف دنيتكم وأنا لسه بفك الخط وأنا اللي مكنتش ابن فلان ف محاولشي.. وأنا الدين اللي بقى عيبة وأنا الفقر اللي صانعينه أنا المادة اللي عملت فرق أنا غلطة عقابها الجلد.. أنا الحمل اللي مبيخلصش وأنا الهم اللي بيبكي وأنا برده اللي مش من حقي يوم أشكي.. أنا شيء ملوش عوزة أنا الوسطة وأنا الكارت اللي بيخلص وقلم الباشا بيأشر وأنا الحب بطيب نية أنا اللي دماغي رجعية أنا البنت اللي بتعنس عشان حبيبها بيحاول.. وأنا الشاب اللي شعره ابيض وعايش عبد لأغراب أنا الحق بكح تراب.. أنا وجودي اللي زي عدمه أنا اللي انتوا عايزينه أنا طول عمري ف القصة ملعبتش غير دور الخادم.. ف أنا فعلا حقيقي مجنون ومش عاقل وأنا الجاهل ولا فاهم وأنا اللي بجد أستاهل