توجهت الناشطة السياسية نوارة نجم، بالشكر إلى كل من شاركها الحزن على وفاة والدها الشاعر أحمد فؤاد نجم، وطالبت الجميع بالدعاء له، مؤكدة أن "نجم" تم دفنه في مقابر العائلة وليس في مقابر الإخوان. وكتبت نوارة نجم، عبر حسابها الخاص على موقع التواصل الاجتماعي "تويتر"، "باشكر كل الناس اللي عزوني، سواء بشكل مباشر بالحضور أو الاتصال أو الرسائل، أو بشكل غير مباشر، عملوا الواجب مع بابا سواء بحسن ذكره أو الدعاء له، وآسفة إني مش قادرة أتكلم ولا أرد على حد.. بس محتاجة وقت أستوعب، لأني مكنتش عاملة حسابي على حاجة كده ولا اتعودت اتحط في موقف ماعرفش أعمل فيه حاجة، ولا كنت حاطة في بالي إن بابا ينفع يحصل له حاجة كده". وأضافت نوارة نجم: "أبويا مش في مقابر الإخوان، أبويا في مقابر ميت عفيف بالغفير جنب المرحوم حسين أخو مراته ودي كانت وصيته، اللي يقدر يعمل أي عمل خير ويوهبه لأبويا ما يتأخرش، ومش حيندم، من تجربتي معاه أبويا مفيش حد عمل معاه أي دقة جدعنة إلا وربنا سد عنه وشاف ثمرة الخير في حياته، حتى لو كانت بكلمة طيبة قالها أسعدت بابا، ومافيش حد زعله أو جرحه إلا وربنا خرب بيته من وسع وخلاه عبرة، ومن رحمة ربنا على الناس اللي أذوا أبويا، إن بابا مكنش بيزعل بسهولة، وإلا كان زمان الناس المخروب بيتهم لا يعدوا ولا يحصوا، وهو جه لكذا حد وقالهم إنه كويس وإنه عايش مش ميت، بس ما جاليش أنا، يمكن عشان لسه مش عارفة أتعامل مع الموضوع". واختتمت نوارة نجم قائلة: "أنا لسه ما ولدتش... وبابا هو اللي سماها فاطمة الزهراء، دعواتكم ربنا يجيب فاطمة الزهراء بالسلامة لأنه هو كان عايزها تيجي، وباعتذر كمان مرة إني مش حاقدر أتواصل مع أي حد الفترة دي.. شكرًا".