دعا الدكتور محمد البرادعي، رئيس حزب الدستور ومنسق جبهة الإنقاذ الوطني، في كلمة متلفزة بثها قبل ساعات من بدء تظاهرات 30 يونيو، والتي دعت إليها حركة تمرد لسحب الثقة من الرئيس مرسي وإجراء انتخابات رئاسية مبكرة، جموع الشعب المصري للنزول والمشاركة في تظاهرات الغد للرجوع مرة أخرى للصندوق واستعادة حلم ثورة يناير. وقال البرادعي: "بكرة نازل في كل شوارع مصر، كبير وصغير، راجل وست، سايبين مصالحهم ومشاغلهم علشان يقولوا كلمة واحدة إننا عايزين نرجع ثورتنا للسكة اللي كان المفروض تمشي فيها". وأضاف: "الثورة دي قامت علشان كل واحد مننا يعيش كإنسان، ويتعامل كإنسان، يأكل ويسكن ويتعالج ويتعلم، ويبقى آمن على ولاده ومراته عايشين سوا، في مجتمع واحد مبنكفرش بعض، عملنا مصالحة وطنية مع بعض، علشان نمشي قدام، عندنا اقتصاد شغال، وللأسف مافيش حاجة من دي اتحققت، وكلنا حاسين إننا ماشين في طريق مسدود، وإن البلد هتقع، مش عشان الرئيس من الإخوان المسلمين، ولا علشان إن فيه فصيل معين هو اللي بيحكم، علشان النظام فشل، فشل تمامًا، وإحنا بنقول النهاردة، عايزين نرجع مرة تانية للصندوق، الشعب المصري انتخب الدكتور مرسي، والشعب المصري نازل بكرة يقول إننا عايزين نرجع مرة تانية للصندوق، إديناله رخصة قيادة معرفش يسوق عربية". وتابع رئيس حزب الدستور: "من مدة بنقول لازم نبني البيت قبل ما نسكنه، قالوا لأ، خلينا نسكن الأول، واكتشفنا إن البيت هيقع، ونص البيت والسكان مبتاكلش ولا بتشرب ولا بتتعالج، ونص البيت بيكفر النص التاني، باختصار الدولة بتتآكل وتنهار، مش دي مصر ومش دي الثورة، أنا بطلب من كل واحد فيكوا إن كل واحد ينزل بأسلوب سلمي متحضر راقي، مصر كلها لازم تنزل بكرة، علشان تقول إننا لازم نرجع مرة تانية للصندوق ونبني البيت اللي هنسكنه كلنا، بيت مفيش حد يفرض رأي علي التاني، بيت فيه دستور يدي حق الإعلام والقضاء ويصالحنا كلنا، خلاص النظام القديم مشي ومش راجع، لابد نتصالح مع بعض، اللي ارتكب جريمة يعاقب، كل واحد تاني لازم يبقي عندنا تسامح حب، وبطلب من الرئيس مرسي أن يسمع ويستجيب للشعب ويشوفه عايز إيه، إننا عايزين انتخابات مبكرة وقبل دا دستور ومصالحة وطنية، أيًا كان مين اللي هيحكم، لازم نعيش مع بعض، مفيش فرق بين مسلم وإخواني وسلفي وقبطي، بكرة لازم نكون صوت واحد، يكون عدد عظيم وسلمية رائعة عشان نحقق ثورتنا عشان نرجع الحلم ويبقي شراكة مش وصاية، انا وانتوا هنكون سوا، نرجع نحقق اللي قمنا بيه من سنتين، مصر قوية قادرة، مصر ستستعيد الثورة وربنا هيكرمنا بإذن الله".