- ليفربول وبرشلونة: "يورجن كلوب" أثبت أن لو كان الوصول للمريخ محتاج سفينة فضاء، الوصول لنهائي أوروبا محتاج مدرب زيه. - كلبش 2: مشهد رجوع سليم الأنصاري مع أمه اللي هي "هالة فاخر" باسها ايديها 6 مرات ، وهي باسته 17 مرة، وباست أيديها مرتين ، معتقدش أن في حد هيعدي ريكورد البوس ده كله في رمضان السنة دي. * - كلبش 3: هالة فاخر بتقول لأمير كرارة اللي هو سليم الأنصاري "يابني ياحبيبي ده انت مت قدامي عينيا أربع مرات قبل كده"، لما ده إحساس أم سليم نفسها، أومال إحنا نعمل ايه ياحجة.
* - حكايتي: هو المخرج ملاقاش ممثلة في مصر كلها تعمل دور أم ياسمين صبري، غير الشابة اللي شكلها أصغر منها دي. * * - حكايتي: اه قبل ما أنسي، هو المخرج برضه ملاقاش واحدة تعمل دور أم أسلام جمال، ومرات أبوه ياسمين صبري في المسلسل غير البنت اللي قده دي. * * - حكايتي: ثواني معلش، هو ليه قافلة كل مشهد بتنتهي علي موسيقي "صراع العروش" و slow motion وإظلام، خير إن شالله ياجماعة، ده مسلسل اجتماعي. * * - حكايتي: ملخص الحلقة Miscasting .
* - لمس أكتاف: هاني سرحان تاني كاتب شاطر في رمضان السنة دي، يقدر يسرد الحكاية ويعمل ربط بين مشاهد الحاضر، ومشاهد المصارعة في الفلاش باك بطريقة جديدة وسهلة وتتفهم.
* - علامة إستفهام: محمد رجب السنة دي بيطبق المثل اللي بيقول "اللي تخاف منه مايجيش أحسن منه". * * - علامة إستفهام: على فكرة المسلسل فيه ممثل حلو أسمه "محمد ناصر". * في اليوم اللي ظهر أسلام حافظ كاتب مسلسل "علامة إستفهام" في الحلقة التانية، ظهر أحمد محي كاتب مسلسل "سوبر ميرو" في الحلقة التانية برضه.
* - أبو جبل: كم الوفيات والمستشفيات واللبس الأسود والطلاق في أول حلقتين، يخليك تتقفل اليوم كله في الحقيقة. * * - أبو جبل: محمد دياب مُصر يثبت أن من أهم المطربين في مصر اللي عندهم موهبة تمثيل كبيرة. * لسه بشكر في "نجلاء بدر" على إنها زوجة جدعة في مسلسل الزوجة 18 ، طلعت زوجة ندلة في "أبو جبل".
* - الواد سيد الشحات: العادي أنك تضحك من ايفيهات أحمد فهمي، بس الصراحة هنا الزاهد اكتشاف في الكوميديا بالنسبة لي. * * - الواد سيد الشحات: مشهد "محمد عبد الرحمن" وهو بيضرب نار علي "محمد محمود" أعتقد أنه أكتر مشهد كوميدي في مسلسلات رمضان لحد الآن. * * - الكلام بالعقل مش بالنص نقل.. محمد عبد الرحمن "الواد سيد الشحات". * * - بدال الحدوتة 3: فكرة أن عمرو وهبة أسمه رمان ماشي، وشيماء سيف أسمها فراولة اوكية، إنما اخوات تؤام ملعوبة الصراحة، وتضحك جداً. * * - بدال الحدوتة 3: هو الواحد أمتى يشوف بيومي فؤاد وميضحكش من غير حتى ما يتكلم. * * - بدال الحدوتة 3: مش لسه بقولكوا أمبارح، ظهور فتحي عبد الوهاب حتى لو في ميت مسلسل في اليوم مبهج وحلو. * * - سوبر ميرو: لو مضحكتش على ايفيهات "حمدي الميرغني" مع "سلوى عثمان" يبقى مش هتضحك خالص وأنت بتتفرج على المسلسل. - سوبر ميرو: ده مش كتافاست، ده كتافاست أند فيروز "حمدي الميرغني"، مولتو ونولتو ياحبيبي "فاطمة كشري" ، بلاش الحاجات دي والنبي عشان ده أسمه قلش مش ايفيهات خالص. * - لو مش مقتنع أن أحمد فهمي أخو محمد عبد الرحمن في "الواد سيد الشحات"، ولا مقتنع بأن أحمد فتحي أخو كريم محمود عبد العزيز في "شقة فيصل" يبقى أكيد مش هتقتنع بأن أحمد محي أخو حمدي الميرغني في "سوبر ميرو". - البرنسيسة بيسة : مي عز الدين موهبة أكيد، دمها خفيف لأ، ممثلة شاطرة أكيد، بتضحك لما تتكلم شعبي لأ، تعمل مسلسل كل سنة بطولة وماله، تقدم كوميدي تاني نصيحة لأ. * - البرنسيسة بيسة: أنا متفهم أن المخرج عايز يعمل داخلة مختلفة لست بيسة وهي خارجة من السجن، بس لدرجة إنها تحوط على وشاشة طرحة سودا وتسوق تاكسي لحد الحارة، ايه السسبينس ده ياأخي. * * - البرنسيسة بيسة: فكرة ربط الست "أطاطا" بالست "سكسكه" تظلمها أكتر ياجماعة والله . - أنا معاكوا أن كل مسلسل عايز يقول للناس أنه أجمد مسلسل ، بس سكرين شوت "الحمدلله الذي تتم بنعمة الصالحات"، وأنا "تريند علي تويتر" دي بطلت من أيام شابوهات يوسف الشريف، فين الكريتفيتي .
