أحلام فى دعوى خلع: ردد «حرقتى كيلو لحمة ب100 جنيه يا مهملة».. والجيران أنقذونى تمتلئ المحاكم بدعاوى مؤلمة، وأخرى تثير السخرية، على ما بها من أوجاع.. أحلام.ن (28 سنة) أقدمت على رفع دعوى خلع ضد زوجها للتفريق بينهما بعد استحالة العشرة، نظرًا لقيامه بضربها ضربًا مبرحًا لأنها نسيت كيلو لحمة أثناء تسويتها على النار، ما أدى الى احتراقها. وقالت الزوجة فى دعواها التى أقامتها أمام محكمة الأسرة بزنانيرى «راجل بخيل وميت على القرش، كل شويه يضربنى بسبب ومن غير سبب، خلاص أنا مش قادرة أعيش معاه يوم واحد زيادة، كفاية أوى اللى شوفته منه والعمايل اللى بيعملها معايا، كرهنى فى العيشة وفى الجواز». وأضافت الزوجة «حصل إيه يعنى لما نسيت اللحمة على النار، ما هى بتحصل مع كل الستات المتجوزة، ولَّا كل راجل مراته هتحرق الأكل يطلع لها وحش يضربها ويكسر عظامها، ليه هو فاكر إن أنا شغالة عنده ولّا مليش أهل عشان كل يوم يصبحنى بعلقة ويمسينى بعلقة». واستطردت الزوجة «من يوم ما اتجوزنا وهو معيشنى فى جحيم لغاية ما كرهت الحياة كلها، راجل بخيل جدًا بيحسب كل حاجة بالقرش، مع أن مرتبه كبير وعيلته ناس كلهم كرم ومبسوطين، لكن مش عارفة هو طالع لمين، حتى الخروجات مغلبنى فيها، كل لما أقوله تعالى نخرج نتفسح شويه زى كل العرسان إحنا لسه شباب القعدة فى البيت دى خليها للناس الكبار، يرد يقولى (مفيش فلوس والميزانية هتخرم منى ومش هنلاقى ناكل)، خلى حياتى معاه لا تطاق مانع عنى الفرحة ومحسسنى إنى متجوزه راجل عنده 100 سنة، مع إنه فى فترة الخطوبة عمره ما كان بخيل كده، دا كان بيموت فى الخروج وبيلح علىّ دائمًا إننا نخرج مع بعض، وعمره ماحسسنى إنه بخيل ولا بيموت على القرش بالطريقة دى، لدرجة إن أنا كنت بارفض ساعات الخروج من كثرة التعب والإرهاق، وفى الآخر طلع كان بيمثل علىّ، بيخدعنى». واختتمت الزوجة «فى الفترة الأخيرة، كان دائم الشكوى من ازدياد الأسعار الجنونى والسلع اللى أصبح ثمنها الطاق طاقين، وكان مقرط أوى ومغلبنى فى مصروف البيت وفى احد الأيام كان جايب كيلو لحمة، وأنا أول ما جيت من الشغل طلعتها عشان أطبخها وبعدين نسيتها على النار فاحترقت، ولما رجع من الشغل قلت له إنى نسيت اللحمة على النار واتحرقت، لقيته راح شاتمنى واتهمنى إنى ست مهملة ومش مقدرة الوضع الاقتصادى وان مرتبه مابقاش بيقضى بعد الأسعار ما زادت، وإن كيلو اللحمة اللى حرقته ب100 جنيه وقعد يضرب فىّ بشكل جنونى وهو بيقول لى يا ست يا مهملة حرقتى اللحمة أم 100 جنيه، وأخذ يردد الكلام ده وهو بيضربنى بشكل هيستيرى لغاية ما الجيران سمعوا الصوت وتدخلوا وأنقذونى من ايده، لولا كده كان زمانه قتلنى من كثر الضرب عشان كيلو لحمة، بعد كل ده قررت إنه مينفعش أعيش معاه يوم تانى بعد كده، هو فيه راجل عاقل يضرب مراته عشان حرقت كيلو لحمة؟!».
