وجه الدكتور أشرف صبحي، وزير الرياضة، التعازي إلى أسرة الملاكم رامز حسام الذي توفى أثناء مشاركته في بطولة الجمهورية للملاكمة. وقال "صبحي" في اتصال هاتفي مع الإعلامي مصطفى بكري ببرنامج "حقائق وأسرار" المذاع على فضائية "صدى البلد" مساء اليوم الخميس. "أنا مقدر كأب لما يكون عنده ابن رياضي ويتباهى به وفي يوم وليلة يتوفى". وأضاف "دي أقدار من عند ربنا لابد أن نبحث عن سبب الوفاة ولازم اللجان المتخصصة تتابع الإجراءات ونقول للأب والأم ربنا يصبركو وهنعمل كل اللي المفروض أنه يتعمل قانونًا". من جانبه كشف إيهاب، خال الملاكم رامز حسام، تفاصيل مفاجأة بشأن هذه الواقعة. قائلًا "سمعنا أكاذيب كثيرة وأنا شاهد على الواقعة أنا روحت أنا ووالدته من القاهرة إلى طنطا وكنا هنعمل له مفاجأة". وأضاف "من أول ما دخل علينا والدته قالت رامز شكله مش هو ده. روحتله على جنب وسألته أنت مالك قالي أنا لعبت كام ماتش حلوين وحاسس بخبطة ورجلي شادة وطلبت منه نمشي قالي أنا هكمل متقلقش". وتابع "في المباراة لما دخل هو مش هو قولت يمكن مش مركز دخل لعب الماتش مكملش دقائق وفضل صامد وتلقى أكثر من ضربة وبعدها الحكم عد وانتهت المباراة". واستطرد "نزل من الحلبة وكان واقف على رجله مسك دماغه وقعد دقيقة ورجع ومدربه رشله مياه وبعدها دخل دورة المياه ودخلت وراه لقيته ممد على الأرض". وأردف "قعدت أقول عايزين دكتور جالنا شاب صغير أشبه بالمسعف وقالي اتصرف في إسعاف مفيش استجابة أصلا شيلته أنا وكابتن وذهبنا إلى مستشفى القوات المسلحة وأنا شيلته على ايدي جري ومش فاهمين فيه ايه". وأكمل "دخلنا بالعافية عملوه له مقطعية وقالولي هو عنده تجمعات دموية ومحتاج جراحة مخ وأعصاب وقالولي الجراحة دي مش موجودة عندنا روح مستشفى طنطا الجامعي". واستكمل حديثه "مفيش إسعاف في المستشفى والطبيب قالي حاجة في المخ متستناش وسندته على رجلي ومعانا أخوه الصغير وركبنا تاكسي وتسأل أي حد المسافة من مستشفى العسكري إلى مستشفى طنطا والزحمة". وتابع "لما وصلنا المستشفى وبقيت اصرخ الحقوا ابني أجروا له تحاليل ونقل دم وكانوا عايزين متبرعين وتجيبوا لنا الدواء من بره لحالة طوارئ محتاجة أقصى سرعة ومحتاج سرعة قصوى". وأوضح "كابتن إسلام هو الوحيد اللي أنا شوفته في نادي اتحاد الشرطة. مكنتش أعرف بصفة ودية ولا رسمية والمسؤولين عن البطولة جم بعد ما البطولة خلصت واختفوا بعدها". وأكمل "مكنش عندنا أي معلومات ومش عارف أخذ أي معلومة والاتحاد مسؤول مسؤولية كاملة لأن ده اللاعب بتاعه وأفاجئ ببيان أقل ما يقال أنه يدينه". وأكد "لو أنت بتعمل كشف دوري هو داخل تعبان وخرج تعبان وشيلته على ايدي مفيش إسعاف ولا دكاترة في لعبة ملاكمة كل ضربها في الدماغ".