أعلن الفنان مصطفى كامل، نقيب المهن الموسيقية، عن حصوله على مبلغ 26 مليون جنيها كايرادات لنقابة المهن الموسيقية خلال 3 شهور من توليه منصب النقيب. وكان قال الفنان مصطفى كامل، نقيب المهن الموسيقية، إن الرقابة على مطربي المهرجانات أهم من قضية الفنانة شيرين في تعاطي المخدرات. أضاف مصطفى، خلال حواره ببرنامج "البخت"، المذاع عبر فضائية "الشمس"، "لو عملت تحليل مخدرات لكل فنان نص النقابة هتمشي". رسالة حلمي عبد الباقي لمصطفى كامل: ووجه الملحن حلمي عبد الباقي، رسالة لمهاجمي الفنان مصطفى كامل من خلال حسابه الشخصي بموقع "فيس بوك". كتب حلمي، "رُب أخٍ لم تلده أمك مصطفى كامل الأخ الصديق الجدع اللي مش ممكن يتخلي عنك وأنت في أي محنة لا قدر الله، إنتوا عارفين أنا عمري ما فكرت اكتب إيه ولا عادتي إني أمجْد في حد، ولكن هذا الرجل أجبرني أن اكتب هذا البوست اللي كل كلمه بكتبها هي من قلبي وبدون تجميل". أضاف، "أنا اشتغلت معاك نقابة وراقبت كل حاجة بتعملها ابهرتني.. ابهرتني وأنت بتتكلم وأنت بتعامل مع كل البشر بمختلف نوعياتها، ابهرتني وأنت تحنوا على كل محتاج، ابهرتني بشجاعتك وأنت بتاخد أي قرار، ابهرتني وأنا بشوف في عينك نظرات الحنان وأنت بتقول لأي راجل كبير أو أي ست كبيرة عيني يابا أو عيني يا أمي وتمسك قلمك وتمضي". تابع، "ابهرتني لما المتعهد س جه يرخص حفل لفنان خليجي كبير وأنت بتتفق معاه وأنت بتقوله أنا مش هجاملك على حساب فلوس الناس لأن دي مش فلوسي، وخدت منه مبلغ لم يستطيع أي حد قبلك أنه يعمله، وكمان قولتله طلع مبلغ للناس اللي تعبت معانا في النقابة وجبت كل الناس العمال اللي في النقابة حتي بتوع البارك وخليته يوزع المبلغ عليهم الله الله عليك". وأكمل، "هقول إيه ولا إيه كل اللي عاوز أقوله ربنا يديم عليك الصحة والعافية ويخليك لأولادك ويخليك نصير كل محتاج ونصير كل مظلوم علشان أنا ديمًا أقولك خلي بالك من صحتك علشان فيه ناس كتير محتاجينك، كان نفسي اكتب كتير أوي بس أنا طولت ومش عارف أنا كتبت كده ليه مش أكتر إني صحيت من النوم لقيت نفسي بكتب ده". واختتم، "أنا عارف أن ممكن ناس ميعجبهاش إني بكتب كده لأمراض نفسية، بس في الآخر مش مهم إحساس حسيته ولازم انقله بأمانه، بحبك في الله يا صديقي الصدوق مصطفى كامل، ونفسي كل الناس اللي ماتعرفكش كأنسان تعرفك وتشوفك على حقيقتك، وكمان الناس اللي بتحاول تهز صورتك أو تقلل منك بقولهم موتوا بحقدكم".
