فاجأ الفنان الكبير لطفي لبيب جمهوره بنفى خبر اعتزاله التمثيل، موضحا أن حالته الصحية لا تسمح له بالعمل لساعات طويلة. وخلال مداخلة هاتفية مع الإعلامية إنجي القاضي في برنامج "مساء dmc" قال لطفي لبيب: "عايز أقول حاجة مهمة، أنا كنت بشتغل 20 ساعة في اليوم، ودلوقت مبقدرش أشتغل، إنما أنا أشتغل على قد طاقتي. فالمخرج اللي بيقوللي تعالى ويستغل طاقتي البسيطة بوافق" وأضاف: "مفيش ممثل بيعتزل، إنما في إمكانيات صحية قادر أو غير قادر أو على قدي، أنا أذكر الله يرحمه الأستاذ كمال الشناوي عمل مسلسل وهو على كرسي متحرك". وتابع: "أنا حالتي الصحية معادتش زي الأول، وعارف إني أصبت بجلطة حددت إمكانياتي، فبشتغل لو جالي شغل على قد صحتي، إنما أنا بحب التمثيل جدا، وأحب وأعشق جمهوري، فصعب إني انسحب بهذا الشكل، وكلمة اعتزال لا اعنيها بالمعنى المطلق". وعن حالته الصحية، قال: "بعمل علاج طبيعي وفي تحسن، بس في عندي رجل وإيد الشمال مبيشتغلوش."
