موضوع المسلسل الجديد بإختصار عبارة عن علاقات كتيرة ومختلفة ما بين الجن والإنس مبنقولش عايزين نخض الناس في "المداح" إحنا بناقش قضية دايرة في بيوت الناس كلها ورعب مختلف وبنحترم عقل المشاهد المداح مش بيروج للدجل والشعوذة وده كلام غريب حمادة هلال كوميديان بشكل كبير وعندها إمكانيات لسه مظهرتش
ينافس مسلسل "المداح أسطورة العشق" (الجزء الثالث) على لقب "الحصان الأسود" في الدراما الرمضانية ل عام 2023 بسبب اختلافه كليًا عن الأجزاء السابقة سواء في المضمون أو في الأبطال أو في القصة والسيناريو كما وضح في البرومو وإذا تطرقنا لهذة النقطة فدعونا نشهد أن نجاح أي عمل فني أو درامي يُنسب في المقام الأول ل البطل أو البطلة من وجهة نظر الجمهور لأنهم الجزء المرئي في القصة أمام الكاميرات وأمام الشاشات وتجسيدهم هو الذي يصل من خلاله الفكرة الخاصة بالعمل على حد قولهم، ولكن ما يغفل عنه الجمهور فعليًا ودائمًا والذي يجب أن يُكرم ويُنسب إليه الفضل في كل وقت هو محرك الاحداث الأساسي "السيناريست" الذي يعتبر بمثابة الجندي المجهول المسئول عن الأحداث بشكل كامل والمسئول أيضًا عن المعالجة والحبكة الدرامية التي تثير من غضب الجمهور أو روعته أو إعجابه أو إثارة مشاعره إلخ.. وفي ذلك الصدد، كان للفجر الفني حوارًا خاصًا مع أحد مؤلفين مسلسل سلسلة "المداح" وهو السيناريست وليد أو المجد ليحدثنا عن بعض التفاصيل الخاصة بالمسلسل بالإضافة إلى رأيه في حمادة هلال كفنان كوميدي وعن وجهه نظره في أغلب الأمور التي تخص المسلسل وإلي نص الحوار: لماذا وقع الاختيار على اسم "أسطورة العشق" في الجزء الثالث وحدثنا عن الاختلافات؟ اختارنا الاسم لأن ده موضوع المسلسل الجديد بإختصار عبارة عن علاقات كتيرة ومختلفة ما بين الجن والإنس في الجزء التالت، أما بالنسبة للاختلاف ف إحنا قدمنا فكرة وموضوع في الجزء الأول وفكرة وموضوع مختلفين تمامًا في الجزء التاني وكل واحد فيهم كان له اسم وبنحاول ننوع مش بنثبت على فكرة واحدة بس، ده غير إننا لما قررنا نعمل الجزء التالت فكرنا في البداية وقولنا هل هنقدم حاجة جديدة مش متكررة أما لقينا الأجابة أه عملنا كدة، لكننا مبنفكرش بطريقة إننا عايزين نكمل سلسلة المداح وخلاص دون هدف. حمادة هلال صرح إنه كان يتمنى عمل فكرة المداح منذ مدة طويلة، فكيف تواصل معكم من البداية ؟ حمادة فعلًا كان متحمس للفكرة من بدري بس مكنش في تيم على المشروع إلى كان عايز يعمله (المداح) ولكن أما أتجمع معايا أنا وأمين وشريف واتكلمنا وقررنا نخوض التجربة، وأنا رأيي دايمًا أن النجاح محتاج كل رؤساء العمل يكونوا بيحبو المشروع وأحنا كمؤلفين ومخرج وبطل وإنتاج وكل المجموعة حابين المشروع جدًا خاصةً لما قعدنا سوا واشتغلنا على المعالجة وخدنا الآراء وبدأنا نطور الموضوع ف ربنا كرمنا ووصلنا لحاجة ترضينا وترضي الجمهور. فريق عمل المداح يوجد خيط رفيع بين الرعب الحقيقي والرعب الهابط، كيف تغلبت على هذة المشكلة وحولتها لصالح المسلسل؟ الموضوع سهل جدًا أنك تقدر تحافظ على ده لما تاخد الموضوع جد وتكون عايز تقدم محتوى حقيقي وله فكرة للجمهور، أنا وأمين وشريف لما بنتكلم في المشروع ده مبنقولش يلا ياجماعه نخض الناس إحنا بنتكلم عن قضية دايرة في بيوت الناس كلها وبنحترم عقلية المشاهد خلال المشاهد، أكيد كلنا اتحكالنا قصص من ناس نعرفها إحنا بقى بناخد القصص دي وبنعملها معالجة درامية ونقدمها للجمهور إنما مفيش مجال الهزار في القضية إلى بنناقشها في المداح خالص". كيف واجهت الأشخاص الذي يعتقدون إن المداح يروج للدجل والشعوذة؟ أنا أول مرة أسمع الكلام الغريب ده ومش عارفه مين بيفكر كدة، ب أي منطق أروج للدجل والشعوذة وفي دجال في المسلسل اسمه عمار اتقبض عليه؟ وب أي منطق المداح بيروج للدجل وحمادة هلال المداح نفسه مش بيتكلم غير بالقرآن والسنة ودايمًا كل حاجه بيمشي بيها في المسلسل زي ما ربنا بيقول، أنا أكون بروج للدجل لما أجيب ناس بتعمل دجل وشعوذة وأركز عليهم وأقول الله دول بيعملوا كدة وده الصح، إنما في المداح كل ده العكس. هل من الممكن أن يجمع بينك وبين حمادة هلال عمل كوميدي ؟ حمادة هلال من أكتر الناس اللي المفروض يعمل كوميدي وأكتر من الجد بكتير كمان، حمادة كوميديان بشكل مش طبيعي وعنده إمكانيات كتير لسه مظهرتش حتى الآن، وممكن يجمعنا عمل ووارد جدًا طبعًا لكن لغاية دلوقتي مفيش اتفاق بينا، وأنا متاكد أن حمادة لو عمل الحتة الكوميدية دي هينافس فيها كويس أوي وهو شاطر في اللقطة دي ده غير إني على المستوى الشخصي بحب افلامه اللايت جدًا زي عيال حبيبة والعيال هربت. ما سر تعاونك الدائم مع المؤلف أمين جمال حتى بعيدًا عن المداح ؟ أمين جمال شريك حياة احنا بدأنا القصة سوا من زمان أوي وبنكتب سوا من أيام مسلسل اذاعي كان بالصدفة برضة ل حمادة هلال كان اسمه "شغل عفاريت" تقريبًا كدة العفاريت معانا من زمان، اشتغلنا سوا كتير في أكتر من حاجة زي خيانة عهد والمداح وزومبي ولينا فيلم في العيد سوا أمين أخويا وأحنا مش مجرد شركاء عمل بس إحنا عيلة واحدة. قبل عرض المسلسل ب يوم، وجه كلمة تشوق الجمهور ل "المداح أسطورة العشق" أسطورة العشق السنة دي مختلفة أوي وفيها مفاجآت كتير أوي هتظهر من أول حلقة، كل إلى شافو البرومو ليهم توقعات ممكن يلاقوا حاجات تانية خالص أنا بوجهلهم رسالة وبقولهم "أنتو هتتفاجئوا مفاجأة عظيمة جدًا". موعد مسلسل المداح 3 (أسطورة العشق) وفي سياق متصل، سيتم عرض أولى حلقات مسلسل المداح 3 غدًا في تمام الساعة الثامنة مساءً بتوقيت القاهرة على فضائية "MBC مصر"، ويُعاد على "MBC مصر2" 5:00 عصرًا، و11:00 مساءً. يشار إلى أن حمادة هلال روج لموعد المسلسل من خلال نشر فيديو على أنغام أحد أغاني الجزء التالت وقال: "بسم الله توكلنا على الله أول حلقة غداُ الاربعاء الساعه 8م ان شاء الله على قناه إم بي سي مصر وشاهد المداح اسطورة العشق يارب أكرمنا". مسلسل المداح الجزء الثالث مسلسل المداح الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك من تأليف وليد أبو المجد وأمين جمال وشريف يسري ومن إخراج أحمد سمير فرج.
