استطاع الفنان محمد الشرنوبي، أن يخطف الأضواء إليه وذلك بعد تحقيقه نجاحًا كبيرًا في الفترة الأخيرة، حيث قدم مسلسل "إيجار قديم" وطرح أغنية جديدة بعنوان "انتي الحياة".
التقى "الفجر الفني" بالفنان محمد الشرنوبي وتحدث إلينا عن نجاحه في مسلسل "إيجار قديم" وأيضًا كشف لنا عن رأيه في الشائعات والتعليقات السلبية التي تعرض لها مؤخرًا وإليكم نص الحوار:
-بداية.. حدثنا عن ترشيحك لمسلسل "إيجار قديم"
"منتج المسلسل كريم أبو ذكري، كلمني وقعد معايا وشرحلي المسلسل وفكرته.. وأنا اتحمست جدًا ومضيت المسلسل حتى من غير ما أقرأ مع العلم أنه كان المسلسل لسه متكتبش فيه حاجة".
- كيف استعددت لمشهد وفاة "سحس"؟
"مستعدتش للمشهد بصراحة أنا مش بعرف أستعد.. وأقول مثلا زي كتير من الممثلين إني قعدت 4 أيام في البيت قافل على نفسي عشان الدور أنا مستعدتش ولا حاجة.. الحقيقة إنى قريت السيناريو كذا مره قبل ما أطلع أصور وقعدت مع طارق رفعت وهو الحقيقة كان مظبط الجو أني أعمله كويس عشان كدة طلع مشهد حلو".
- لو الشرنوبي مكان طارق كيف كان سيتصرف مع شخصية مسيطرة مثل ريهام؟
"مظنش أني ممكن أعرف أتعامل مع شخصية مُسيطرة وشخصية عندها عجرفة في الأسلوب وطريقة الكلام لأني معرفش أتعامل معاها بصراحة.. وشخصية زي شخصية ريهام دي مش النوع اللي أحب ارتبط بيه".
- أخبرنا من وراء اختيار الأغاني القديمة التي أقدمت على غنائها في المسلسل؟
"الأغاني اللي اتعملت في المسلسل كانت اختيارنا كلنا.. من "أمانة عليك" و"تلات سلامات" كانوا اختياري واتوافق عليهم، وأغنية "الشقة الشقة" دي بتاعتي.. وآخر أغنية في المسلسل "أنتي الحياة" أنا اللي عملها وكانت اقتراحي لأن كريم أبو ذكري كان طالب مني أغنية للمسلسل.
-هل توقعت نجاح المسلسل بهذا الشكل الكبير ؟
"أنا مش بتوقع أنا بتمنى.. فدائمًا بتمني النجاح في أي حاجة بعملها، لو منجحتش دي حاجة بتاعت ربنا أو يكون حد من الصُناع قصر في حاجة.. بس الحمد لله المسلسل نجح وكسر الدنيا وعمل شغل حلو أوي".
-ما سر الكيمياء بينك وبين الفنان محمد يسري؟
"مفيش سر هو إحنا صحاب وأخوات وطول الوقت قاعدين مع بعض.. ودماغنا قريبة من بعض فبنعرف نشتغل سوا بشكل سلس ولو عندنا فكرة بتطلع علطول، يعني بنعرف نشتغل مع بعض ونعمل ورشة عمل لذيذة".
-أثيرت مؤخرا عنك بعض الشائعات بتعمد إهانة الآذان.. ما تعليقك عليها؟
"هي مش إشاعات.. الناس بتاخذ كلمة وبتفسرها علي مزاجهم.. أنا قاعد بقول الآذان وبقوله بصوت كويس وقاعد منبهر بالآذان، كنت قاعد في الفيديو بشرح قد ايه الموضوع مُمتع وبيخلي الناس تروح تصلي وهي مبسوطة، لأن الآذان الحلو بيجذب الناس للصلاة في المسجد،يمكن خاني التعبير شوية بأن أنا قولت أنه يا جماعة ده حاجة رعب من كتر الحلاوة.
-هل تؤثر التعليقات السلبية عليك؟
"لو مفيش جدال علي شخص والناس دائمًا تفضل تتكلم علي الشخص ده.. لأن مجرد وجود جدال واختلاف في وجهات النظر علي أي حاجة أنا بعملها، فده معناه أن الحمد لله أنا موجود وناجح ومحقق حاجات كتير ده اللي يفرق معايا بصراحة، إنما اضايق من كومنت أو اي حاجه بالعكس لأن مفيش حد عليه إجماع".
-هل هناك سبب معين وراء تقديمك كاڤر للأغاني القديمة؟ طبعًا.. حبي لتقديم الأغاني القديم بصوتي له سبب معين، يمكن أني أكون بحاول أحافظ علي الهوية الموسيقية المصرية علي قد ما أقدر لأنها بدأت تختفي شوية.. وأنا بحب التراث وشكل المزيكا بتاعنا فيمكن عشان كدة بحاول علي قد ما أقدر أحاول اخلي لسه في وجود للهوية الموسيقية المصرية.
-من الممثلين الذين ترغب في التمثيل معهم.. ومع من تفضل تقديم ديو غنائي؟
"مفيش حد معين يعني الحمد لله أنا مثلت مع كل النجوم الكبار وطبعًا كلهم كانوا مميزين ومهمين جدًا بس مثلًا أتمني أشتغل مع كريم عبد العزيز، لأني بحبه جدًا.
أما علي الصعيد الغنائي فأتمنى تقديم ديو مع سميرة سعيد.. وكمان عايز أعمل ديو مع عفرتو.
-ما هي خطواتك في 2023 ؟
"لسه مفيش حاجة أكيدة عندي كذا حاجه بقرأها وبشوف لسه هعمل فيهم ايه.. ومفيش اي حاجة واضحة أقدر أصرح بيها".
